AZAL ұшағының апатына бір жыл: Ақтауда құрбандарды еске алды

Ақтау қаласында тұрғындар мен құтқарушылар бір жыл бұрын болған әуе апатын еске алды. 2024 жылғы 25 желтоқсанда «Әзербайжан әуе жолдары» компаниясының Бакуден Грозныйға бағыт алған жолаушылар ұшағы Ақтау әуежайына жақын маңда апатқа ұшырап, 38 адам қаза тапты, тағы 29 адам жарақат алды. Бұл туралы Евронью́с хабарлады.

Ұшақ бортында 67 адам, оның ішінде бес экипаж мүшесі болған. Әуе диспетчерлері апат алдында ұшақтың авариялық жағдайға тап болғанын хабарлап, Ақтауға қонуға рұқсат берген. Алайда екі рет сәтсіз қону әрекетінен кейін лайнер үшінші ретте әуежайдан үш шақырым жерде, Ақшұқыр ауылы маңында жерге құлады.

Оқиға орнына 482 құтқарушы, 97 арнайы техника, 10 кинологиялық топ және екі ұшақ жұмылдырылды. Алғашқылардың бірі болып Маңғыстау облыстық жедел медициналық көмек орталығының дәрігерлері жетті. Олар бірнеше жолаушыны құтқарып үлгерді. Жергілікті тұрғындар да көмекке келіп, жарақат алғандарды ауруханаға жеткізуге атсалысты.

Ақтаудағы ауруханаларда 29 адам емделді, олардың 11-і ауыр жағдайда жансақтау бөліміне түсті. Дәрігерлердің айтуынша, көптеген науқастардың бас сүйек-ми жарақаттары, сынған сүйектері болған. Қала тұрғындары қан тапсыру үшін кезекке тұрды.

Қазақстанның Төтенше жағдайлар министрлігі апаттан кейінгі өртті 30 минут ішінде сөндіргенін хабарлады.

2025 жылдың ақпанында Қазақстан Көлік министрлігі алдын ала есеп жариялап, ұшақтың Ресейдің әуе қорғаныс жүйесі атқан зымырандардың бөлшектерінен зақымданғанын мәлімдеді. Пилоттар Минералды Сулар немесе Махачқалаға қонуға рұқсат сұрағанымен, ресейлік диспетчерлер бас тартқан.

2024 жылдың желтоқсанында Ресей президенті Владимир Путин Әзербайжан президенті Ильхам Әлиевтен кешірім сұрап, оқиғаны «трагедиялық инцидент» деп атады. Ал биыл қазан айында Душанбеде өткен кездесуде ресейлік әуе қорғанысы азербайжандық жолаушылар ұшағын қателесіп атып түсіргенін ресми мойындады.

Қайғылы оқиғаның бірінші жылдығы қарсаңында Әзербайжан президенті Ильхам Әлиев ТМД-ның бейресми саммитіне қатысудан бас тартты.

Бүгін, 13:16