Азаматтық қоғам реформалар мен әлеуметтік жобалардың негізгі қозғаушы күші

Азаматтық қоғам – азаматтардың белсенділігі, қоғамдық ұйымдардың жұмысы және мемлекет пен қоғам арасындағы өзара диалог арқылы қалыптасады. Қазақстанда азаматтық қоғамды дамытуға ерекше назар аударылып келеді, бұл бағыт соңғы жылдардағы мемлекеттік саясаттың басым бөлігіне айналды. Бұл мәселеге Мемлекет басшысы Қасым-Жомарт Тоқаев та ерекше назар аударып отыр, - деп хабарлайды Aikyn.kz.

Президент жыл сайынғы жолдауларында да азаматтық қоғамды дамыту мақсатында қоғам мен билік арасындағы ашықтықты арттыру, қоғамдық бастамаларды қолдау мәселелеріне ерекше көңіл бөледі. Мемлекеттік органдар, ҮЕҰ, қоғамдық кеңестер мен басқа да азаматтық институттар арасындағы диалогты дамыту – негізгі міндеттердің бірі ретінде қарастырылып келеді. 

Бұл туралы Президент былтыр Астанада өткен Қазақстанның XII Азаматтық форумы қатысушыларына арналған құттықтау сөзінде де баса айтқан болатын.

«Бүгінде Қазақстанда 18 мыңнан астам үкіметтік емес ұйым жұмыс істейді және оларды мемлекеттің сенімді серіктесі деуге толық негіз бар. Шын мәнінде, сіздер еліміздің береке-бірлігін нығайтуға, «Адал азамат», «Заң мен тәртіп», «Таза Қазақстан» қағидаттарын іске асыруға белсене атсалысып жүрсіздер. Мемлекет азаматтық қоғамның өрісін кеңейтуге әрдайым баса мән береді. Бес жылда арнайы әлеуметтік тапсырысқа бөлінетін қаржы екі есеге жуық өсті. Бұл қаражат игі бастамаларды жүзеге асыруға, мұқтаж жандар мен жастарды қолдауға жұмсалып жатыр. Ортақ мүдде жолындағы осындай өзара тиімді ықпалдастық алдағы уақытта да жалғасын табады», - деген еді Президент.

Бұл ретте кейінгі бес жылда Азаматтық форумның қорытындысы негізінде әзірленген ұсыныстар бойынша елімізде стратегиялық маңызы бар бірнеше құжат қабылданғанын атап өткен жөн. Нақтырақ айтсақ, «Азаматтық қоғамды дамытудың 2030 жылға дейінгі тұжырымдамасы», «Қоғамдық бақылау туралы» заң, одан бөлек онлайн-петиция институтын енгізу жөніндегі заңнамалық түзетулер және өзге де маңызды бастамалар бар.

«Азаматтық сектор реформаларды жүзеге асыру мен қоғамды дамытуда маңызды рөл атқарады. Мемлекет пен үкіметтік емес ұйымдар арасындағы серіктестік өзекті мәселелерді шешуге, жасампаз құндылықтарды ілгерілетуге және ұлт сапасының жаңа деңгейін қалыптастыруға ықпал етеді», - деп атап өткен болатын Қасым-Жомарт Тоқаев. 

2023–2024 жылдары елде ҮЕҰ жобаларын қаржыландыруға 60 млрд теңгеден астам қаржы бөлінген. Бұл ретте 2023 жылы 26,5 млрд теңгеге 2091 жоба жүзеге асырылса, 2024 жылы 33,7 млрд теңгеге 2191 жоба іске асырылған. Ал 2025 жылы жалпы құны 33 млрд теңгені құрайтын 2105 жоба іске асырылуда. Қаржыландырудың ең үлкен үлесі халықтың әлеуметтік осал топтарын қолдауға бағытталған жобаларға тиесілі. Ол жалпы бюджеттің 45,6 пайызын құрайды.

Азаматтық қоғамның дамуы қабылданатын шешімдердің сапасына және мемлекеттік институттардың тұрақтылығына тікелей әсер ететінін айта кеткен жөн. Соның негізінде Қазақстанда азаматтық қоғамды дамыту мемлекеттік саясаттың маңызды бағыты саналады. Бұл бағыттың жүзеге асырылуы азаматтардың белсенділігін арттыруға, қоғам мен билік арасындағы сенімді нығайтуға және демократиялық институттарды дамытуға септігін тигізеді.