БАӘ Қазақстанға қаржы салған он инвестордың қатарына кіреді

Біріккен араб әмірліктері Қазақстанға қаржы салған ең ірі 10 инвестордың қатарына кіреді.

Шығанақ тарапы алдағы жылдары нарықтағы осы орнын сақтап қана қоймай, оны одан әрі нығайтуға ниетті. «Eurasian Gulf» бизнес қауымдастығының жетекшілері осылай дейді. Құрамына 200-дей жергілікті кәсіпкерді топтастырған құрылым Абу Дабиде Қазақстанның іскерлік кеңес мүшелерімен кездесті. Екі жақтың бизнес миссия жетекшілері биылғы жоспарды нақтылап, қолға алынған істерді пысықтады. Мамандардың айтуынша, тараптар үкімет деңгейінде стратегиялық маңызы бар салаларда бірнеше келісімге қол жеткізді. Оның жалпы құны 5 млрд долларға парапар. Өзара экономикалық әріптестікті нығайтатын жаңа бастамалар қатарында жаңартылған энергия, логистика, тау-кен, қаржы, сондай-ақ әуежай мен порттарды бірлесіп басқару жөніндегі жоспарлар бар. Бұл тұрғыда араб компаниялары еліміздің жаһандық сауда дәліздеріне қосылуына игі ықпал етпек. 

Навар Абдулвахед, БАӘ "Eurasian Gulf" бизнес қауымдастығының бас атқарушы директоры:

- Қауымдастықтың осы жолғы отырысында Қазақстанға ерекше назар ауды. Кейінгі 3 жылдан бері басқосу дәстүрге айналған. Жиынға 60-тан астам жергілікті кәсіпкер мен инвестор келді. Мемлекеттік орган өкілдері де бар. Бүгін сіздің елмен бірлескен ынтымақтастық төңірегінде қызықты әңгіме өрбіді. Ерекшелігі сол, кездесу еркін форматта өтуде. Келушілер бір-бірімен еш қысылмай, барлық тақырыпта әңгімелесе кетеді. Осы жағдайды ескере отырып, алдағы уақытта қазақ жеріне бизнес миссиясымен бару керегін аңғарып отырмыз.