Банкомат арқылы қолма қол ақша шешу көлемі 5,8 трлн теңгеге дейін қысқарды

Есепке сәйкес, қолма-қол ақшасыз транзакциялар көлемі 5%-ға өсіп, 42,4 трлн теңгеге жеткен. Ал өткен жылы бұл көрсеткіш 22,4% болған еді. Қолма-қол ақшасыз төлемдердің жалпы операциялардағы үлесі 87,9%-ды құрады. Бір жыл бұрын бұл көрсеткіш 87,1% болған.

Сонымен қатар, банкоматтар арқылы қолма-қол ақша шешу операциялары 2,2%-ға азайған. Бұл – соңғы жылдардағы алғашқы төмендеу әрі салыстырмалы, әрі абсолюттік көрсеткіш бойынша тіркеліп отыр.

Төлем карталарының саны да баяу өсуде: биыл өсім 3,9% болса, өткен жылы 7,9% болған. Оның ішінде жергілікті карталар саны 4,2%-ға артып, 28,2 млн-ға жетсе, халықаралық карталар 3,8%-ға көбейіп, 56,9 млн болған.

POS және QR арқылы төлем жасау үлесі тиісінше 10,6% және 10,7%-ға дейін өскен. Бұл офлайн инфрақұрылымның дамып жатқанын көрсетеді. Ал қолма-қол ақшасыз операциялардың орташа чегі 13,1 мың теңгеге дейін төмендеген.

ҚҚҚ мамандарының айтуынша, қолма-қол ақшасыз төлемдер нарығы дамуы жаңа кезеңге өтуде. Енді негізгі рөлді жаңа пайдаланушыларды тарту емес, сервистерді пайдалану жиілігі атқарады. Сарапшылар алдағы өсім әлеуеті цифрлық қызметтер аз таралған өңірлермен байланысты екенін айтып отыр.