Бәріне бірдей бөліп беру емес : Тоқаев нағыз әділеттілік не екенін айтты

АСТАНА, 30 маусым – Sputnik. Президент Қасым-Жомарт Тоқаев мемлекеттегі нағыз әділеттіліктің не екенін түсіндірді, деп хабарлайды Sputnik Қазақстан.

"Шынайы әділеттілік дегеніміз ел игілігін бәріне бірдей бөліп беру емес. Нағыз әділеттілік – әр азаматқа тең мүмкіндік беретін тиімді әрі мұқият ойластырылған жүйе құру деген сөз. Ең бастысы, барлығы заң алдында тең болуға тиіс. Бұл - Әділетті Қазақстанның мызғымас қағидаты", - деді Тоқаев парламент палаталарының бірлескен отырысында.

Президенттің айтуынша, заңсыз иемденген активтерді елге қайтару туралы заң – сол қағидаттың нақты көрінісі.

"Аталған заң аясында елге триллион теңгеден астам қаражат қайтарылды. Қазірдің өзінде қаржының жартысынан көбі халық игілігіне жұмсалды. Соның есебінен 450 аса маңызды әлеуметтік және коммуналдық нысан салынды", - деп түйіндеді Тоқаев.