Батыс Қазақстанда қазақ тойындағы қалжың жоралғы төбелеске ұласты

Оралда тойдағы қалжың-жоралғы соңы ауыр салдарға әкеп соқтырған төбелеске ұласты, деп хабарлайды Tengrinews.kz тілшісі "Мой ГОРОД" сайтына сілтеме жасап.

Оқиға "тентек кәде" жоралғысы кезінде болған. Бұл – екі жақтың туыстары арасындағы қарым-қатынасты нығайтып, көңіл көтеру мақсатында ұйымдастырылатын, түрлі қалжыңдар мен қызықты тапсырмалар беріліп, символикалық сый-кәде талап етілетін дәстүр.

Алайда күйеу жігіт жағының бір өкілі бұл қалжыңдарды көтере алмай, шамданып қалған. Екінші қатысушы қалжыңын жалғастырған кезде, ол ашуға булығып, жұдырық ала жүгірген. Әлеуметтік желіде тараған кадрлардан ер адамның тағы бір қонақты бетінен тартып жібергенін көруге болады.

Соққы салдарынан зардап шеккен адам ауруханаға жатқызылды. Алдын ала мәлімет бойынша, оның бірнеше тісі сынып, қабырғалары зақымдалған. Қазіргі уақытта жанжалдың нақты мән-жайы мен денсаулыққа келтірілген зиянның ауырлығы анықталып жатыр.

Instagram-дағы бұл жарияланымды көру

Мой ГОРОД (@mgorod.kz_media) жарияланымы

БҚО полиция департаментінің баспасөз қызметі аталған дерек бойынша құқық қорғау органдарына ешқандай арыз-шағым түспегенін хабарлады. Жанжалға қатысушылардың жеке басы анықталды, қазіргі уақытта тексеру жүргізіліп жатыр.

"Азаматтардың өз түсініктемелеріне сәйкес, бұл жағдай қойылымдық сипатта болып, алдын ала дайындалған көрініс екен", - деп атап өтті тәртіп сақшылары.

Google News арқылы жаңалықтарымызды қадағалаңыз