Бауыржан Байбектің әкесінің компаниясы Ақмола облысында тау кен байыту комбинатының құрылысын аяқтамақ

Ақмола облысында «Алексеевское» каолин кен орны негізінде тау-кен байыту комбинатының құрылысы аяқталу сатысында. Жобаны «Qazaq Kaolin» ЖШС жеке инвестициялар есебінен жүзеге асырып жатыр. Бұл компания иелерінің қатарында бұрын Алматының әкімі болған Бауыржан Байбектің әкесі Қыдырғали Байбек бар. Бұл туралы өңірлік әкімдік хабарлады. 

Компанияның екінші иесі ретінде астаналық Aray Media Group ұжымдық қорын басқаратын Бекзат Керімбай көрсетілген. 

Әкімдіктің ақпаратына сәйкес, өндіріс неміс компаниясы «AKW»-нің заманауи технологиясы бойынша ұйымдастырылады, бұл экологиялық таза әрі дерлік қалдықсыз өңдеу процесін қамтамасыз етеді. 

Қазіргі таңда негізгі құрылыс-монтаж жұмыстары негізгі корпус, зертхана және техникалық бақылау бөлімінде аяқталған. Ішкі және сыртқы инженерлік желілерді, газ жабдықтарын және автоматтандыру жүйелерін орнату жұмыстары жалғасуда. Жоғары технологиялық жабдық сатып алынған және орнатылған. Жабдықты іске қосу және реттеу жұмыстары 2026 жылдың көктемінде шетелдік мамандар қатысуымен жоспарланған, ал пайдалануға беру шілде айының басына белгіленген.

Құрылыс басталғаннан бері Алексеев кен орнында 120 мың тонна шикізат өндірілді. Сатып алу бойынша қазақстандық құрам үлесі 96%-ды құрады. 53 жаңа жұмыс орны құрылды, өндіріс іске қосылғаннан кейін олардың саны 90-ға жетеді.

«Qazaq Kaolin» ЖШС бас директоры Марат Хасеновтың айтуынша, «Комбинат базасында технологиялық кластер қалыптасып, бұл керамика, құрылыс материалдары және басқа да өнімдерді өндіруді дамытуға мүмкіндік береді. 

Бауыржан Байбек 2015 жылдан 2019 жылға дейін Алматы қаласының әкімі қызметін атқарды. Оның әкесі Қыдырғали Байбек зейнеткерлікке шыққаннан кейін кәсіпкерлікпен айналысты. 2023 жылы ол құрылыс жұмыстарындағы рәсімдерді бұзу ісі бойынша әкімшілік жауапкершілікке тартылды.

Бүгін, 14:43