Біле жүріңіз: Ақшаны дұрыс жинаудың тәсілі қандай?

Көпшілік үшін пәтерге ақша жинау немесе жай ғана қаржылық қауіпсіздік жастығын қалыптастыру оңай емес болып көрінеді. Алайда, ranking.kz порталының мәліметінше, бұл мақсатқа жету үшін жоғары табыс табу емес, жүйелілік пен тәртіп басты рөл атқарады. Ең басты қағида – «қашан мүмкіндік туады» деп күтпей, табысыңыздың белгілі бір бөлігін әр ай сайын жинап отыру, деп хабарлайды Egemen.kz.

Бүгінде халық арасында ең танымал жинақ құралы – банк депозиті. Ұлттық банктің дерегіне сүйенсек, соңғы бес жылда ел азаматтарының банктердегі салымдары тұрақты өсіп келеді. Бұл азаматтардың болашағына қаржы бөлу мәдениеті қалыптасып жатқанын көрсетеді.

Мәселен, 2025 жылғы тамыз айының соңында жеке тұлғалардың банк жүйесіндегі салымдары 26 трлн теңгеден асты, бұл өткен жылмен салыстырғанда 17,5%-ға немесе 3,9 трлн теңгеге көп. Соңғы үш жылдағы орташа жылдық өсім 22,5% болса, 2020–2022 жылдары бұл көрсеткіш 17,7%, ал 2017–2019 жылдары 6,6% шамасында болған. Демек, азаматттар жинақтаудың маңызын барған сайын түсіне бастаған.

Алайда, ең қиыны жинауды бастау емес, оны үнемі жалғастырып отыру. Яғни, алдымен жұмсаймын, қалғанын жинаймын деген түсінік қате. Шын мәнінде, керісінше істеу қажет: табысты алған сәтте алдымен белгілі бір бөлігін жинаққа жіберіп, тек қалғанын күнделікті шығындарға бөлу керек. Тіпті табыстың 10 пайызын тұрақты түрде жинап отырсаңыз, уақыт өте келе бұл елеулі капиталға айналады. Бұл күрделі пайыздың әсері, яғни ақша өзіңізге табыс әкеліп, «жұмыс істей» бастайды.

Мұндай тәсіл үй алу секілді ірі мақсаттарға жетуге де көмектеседі. Жүйелілік пен жинақ дағдысы адамның қаржылық тұрақтылығын арттырып, армандаған баспанасына бір қадам жақындатады.

Айта кетерлігі, Отбасы банкінің «Арманға жол» атты қызметі бұл үдерісті жеңілдетіп отыр. Жүйе арқылы қызметкерлердің жалақысынан автоматты түрде белгілі бір сома шегеріліп, банк депозитіне аударылады. Яғни, бұл коммуналдық төлемдер секілді ай сайын автоматты түрде жұмыс істейтін автожинақ жүйесі.

Қызметті пайдалану үшін қызметкер өз ұйымының бухгалтериясына жүгініп, ай сайынғы аударым сомасын көрсетуі керек. Ақша жалақы түскен күні автоматты түрде есепшотқа түседі. Ал бухгалтерлер бұл үдерісті ресми рәсімдеп, Отбасы банкінің серіктес кеңесшісі ретінде қосымша ақы да ала алады.

Сондай-ақ автожинақты Otbasy bank мобильді қосымшасы арқылы да орнатуға болады. Бұл қаражатты дер кезінде және үздіксіз жинауға мүмкіндік беретін ыңғайлы әдіс.Автожинақ жүйесінің бірқатар артықшылығы бар:

Әр жылдың қорытындысы бойынша мемлекет салымшыларға 20% көлемінде сыйақы береді (200 АЕК-тен аспайтын сомаға).  2025 жылы ең жоғарғы мемлекеттік сыйақы 157 280 теңге болып белгіленген. Оны алу үшін жыл соңына дейін депозитті кемінде 786 400 теңгеге толықтыру қажет. Депозитті жүйелі түрде толтыру арқылы салымшының бағалау көрсеткіші артады, бұл өз кезегінде 5–3,5% аралығындағы ең төменгі пайызбен ипотека алуға мүмкіндік береді.

Қазіргі таңда тұрғын үй құрылыс жинақ жүйесі еліміздегі ең тиімді ипотекалық құрал саналады. Отбасы банкінің мәліметінше, күн сайын шамамен 2 500 жаңа депозит ашылып, 190 несие рәсімделеді. Тек 2025 жылдың өзінде 670 мыңға жуық азамат жаңа жинақ шотын ашқан.

22 жыл бойы табысты жұмыс істеп келе жатқан бұл жүйе көптеген азаматқа өз баспанасын алуға және қаржылық тәртіп орнатуға көмектесіп отыр.