Бір ай бұрын тағайындалған ТЖМ басшысы қызметінен қуылды

Қырғыз Республикасы Төтенше жағдайлар министрлігінің басшысы Урматбек Шамырқанов бұл лауазымда бір ай да отыра алмады. Ол ақпан айында тағайындалған болатын, ал қазірдің өзінде отставкаға жіберілді. Ол министрдің орынбасары болып тұрған кезде пара алды дегене күдікке ілінді, деп хабарлайды Arasha.kz.

Билік өкілдерінің нұсқасы бойынша, қызметкерлердің бірі лауазымын өсіргісі келген, ал министр орынбасары сол үшін 100 мың сом сұраған көрінеді. Қызметкер соманың жартысын электронды әмиянға аударған. Қалғанын аударуға мүмкіндігі болмаған. Соның салдарынан лауазымы өсудің орнына, ол Баткен облысындағы бөлімшеге қызметке жіберілген. Қызметкер бұған ренжіп, тікелей президент Садыр Жапаровтың атына арыз жазған. Президент Бас прокуратураға бәрін тексеруді тапсырып, нәтижесінде деректер расталғаны айтылуда. Арызға тіпті Шамырқановтың атына аударылған әлгі 50 мың сомның скриншоты да қоса тіркелген.

Нәтижесінде жаңа төтенше жағдайлар министрінің ғұмыры «төтенше» қысқа болып шықты, оның креслосы бір айға да жетпеді.

Осы оқиғалар аясында Жапаровтың өзі бүгін парламентте кадр мәселесінің қиын екенін айтып шағымданды. Оның сөзінше, ТЖМ-нің алдыңғы басшысы жұмыстан кеткеннен кейін оған бұл орынға он кандидат ұсынылған, бірақ олардың барлығының дерлік беделі күмәнді болып шыққан.

«Тоғызының үстінен коррупциялық істер бар екені анықталды. Бізде мемлекеттік қызметте таза әрі дұрыс кадрлар қалмаған ба?» - деді президент.

Айта кетейік, мұның бәрі тағы бір оғаш оқиғамен тұспа-тұс келіп отыр. Жақында Жапаров жеңгетайлық жасағаны үшін сотталған Даниэль Ажиевке кешірім жасаған болатын. Ол түрмеден ТЖМ тікұшағымен ұшып шыққан, бірақ бостандықта ұзақ жүре алмады, көп ұзамай есірткі сақтады деген күдікпен қайта ұсталды. Кейінірек президенттің өзі бұл жағдайға көңілі толмағанын мойындады.