Бірдей мектептердің құны әртүрлі болуы депутатты таңғалдырды Оқу ағарту министрлігі не деп жауап берді

Шығыс Қазақстан облысының Опытное поле ауылындағы 300 орындық мектепке бюджеттен 4,7 миллиард теңге жұмсалса, Батыс Қазақстан облысының Пугачев ауылындағы дәл осындай мектеп құны 3 миллиард теңге болған. Оқу-ағарту министрлігі мұндай айырмашылық себебін түсіндірді, деп хабарлайды Tengri Education.

Шығыс Қазақстан облысының Опытное поле ауылындағы 300 орындық мектепке бюджеттен 4,7 миллиард теңге жұмсалса, Батыс Қазақстан облысының Пугачев ауылындағы дәл осындай мектеп құны 3 миллиард теңге болған. Оқу-ағарту министрлігі мұндай айырмашылық себебін түсіндірді, деп хабарлайды Tengri Education.

Нысандар құны туралы сауалды Сенат депутаты Андрей Лукин қойды. Лукин "Жайлы мектеп" ұлттық жобасына жүргізілген аудит нәтижесіне сүйенді. Оның айтуынша, ұқсас жағдайлардағы қуаттылығы бірдей мектептердің құрылыс құнында айтарлықтай айырмашылық бар.

"Шығыс Қазақстан облысының Опытное поле ауылындағы 300 орындық мектеп бюджетке 4,7 миллиард теңгеге түссе, Батыс Қазақстан облысының Пугачев ауылындағы дәл сондай мектеп 3 миллиард теңге тұрды. Көріп отырғанымыздай, айырмашылық 1,6 миллиард теңге болды", - деп атап өтті Андрей Лукин.

Депутат мұндай айырмашылық неден туындағанын және мемлекет мектеп құрылысы құнының бірыңғай қатаң стандартын енгізуді жоспарлап отыр ма деп сұрады.

Депутат бұл сауалды премьер-министрдің орынбасары - ұлттық экономика министрі Серік Жұманғаринге жолдаған болатын, алайда оған оқу-ағарту министрінің міндетін атқарушы Жайық Шарабасов жауап берді.

Шенеунік айырмашылықты бірнеше фактормен түсіндірді. Біріншісі - аумақтың сейсмикалық жағдайы. Оның айтуынша, Опытное Поле ауылында сейсмикалық қауіптілік 7 балл, сондықтан жобалау кезінде тиісті түзету коэффициенті қолданылған. Ал Пугачевте бұл көрсеткіш 6 балл, мұндай коэффициент қолданылмаған.

"Сейсмикалық жағдайларға байланысты әртүрлі конструкторлық шешімдер қолданылады", - деп түсіндірді Жайық Шарабасов.

Сонымен қатар Опытное Поледегі учаске беткейде орналасқан. Бұл аумақты тегістеп, тіреу қабырғаларын тұрғызу бойынша қосымша жұмысты талап еткен.

Шығыс Қазақстан облысындағы учаске көлемі де үлкенірек болып шықты, соған байланысты алаң ішіндегі инженерлік желілерді тартуға қосымша шығын қажет болған.

"Мектептердің барлық жобалық-сметалық құжаттамасы сметалық шығындардың шынайылығы мен объективтілігі тұрғысынан қатаң мемлекеттік сараптамадан өтті", - деді министрдің міндетін атқарушы.

Сондай-ақ Лукин жаңа нысандар жүктемесіне назар аударды. Оның мәліметінше, 75 мектептің ішінде біреуі небәрі 29 пайыз, 8 мектеп - 30–50 пайыз, тағы 16-сы - 50–70 пайыз жүктелген.

Шарабасов ірі қалалар мен олардың маңындағы агломерациялардағы мектептердің бір бөлігі алдын алу мақсатында - болашақ тұрғын үй құрылысы мен көші-қон ағынын ескере отырып салынғанын айтты.

Оның сөзінше, жобаны іске асыру 52 үш ауысымды және 12 апатты мектеп мәселесін шешуге, сондай-ақ 100-ден астам мектептегі оқушы орны тапшылығын азайтуға мүмкіндік берді.

Жоба аясында барлығы 460 мың оқушыға арналған 217 мектеп салынды. 2025 жылдың қорытындысы бойынша 198 нысан пайдалануға беру актілерін алды. Қазір 215 мектеп бойынша осындай құжаттар рәсімделген, тағы 2 мектепті ай соңына дейін іске қосу жоспарланып отыр.

2024 жылдың басында "Жайлы мектеп" жобасын іске асыруға 2,3 триллион теңге қарастырылғаны хабарланған болатын. Ол кезде 740 мың оқушы орнына арналған 369 мектеп салу жоспарланған еді.

Сол жылдың қыркүйегінде Қаржылық мониторинг агенттігі жайлы мектептерді салу кезінде артық шығындардың алдын алғанын хабарлады.

Кейін жоба операторы сметаның негізсіз өсірілу жағдайлары, соның ішінде өлшем бірліктеріндегі қателіктер мен коэффициенттердің орынсыз қолданылуы туралы айтқан болатын.

Google News арқылы жаңалықтарымызды қадағалаңыз