Бішкек билігі заңсыз салынған балкондарды бұзуға кірісті

Балкон бұзу шарасы екі жыл бұрын қабылданған заң аясында жүзеге асырылып отыр және де бұл жұмыс Бішкектің бірнеше ауданын қамтиды.

2024 жылы қабылданған заң қала әкімдігіне ғимараттарға заңсыз салынған қосымша құрылыстарды бұзу құқығын берді. Құжаттың негізгі мақсаты қаланың тұтас сәулеттік-эстетикалық келбетін жақсарту.

Көпқабатты үйлердің қасбетінен шығып тұратын қайта жасалған балкондар посткеңестік кеңістіктегі көптеген қалаларға тән құбылыс. Мұндай құрылымдар Кеңес Одағы тарамай тұрып-ақ пайда болған. Тұрғындар шағын пәтерлердегі орынды ұлғайту үшін балкондарын кеңейтіп, қайта жабдықтаған.

Көп жағдайда мұндай қосымша құрылыстар қолданыстағы бетон балкондардың үстіне металл қаңқамен тұрғызылған.

Бішкек тұрғындарының айтуынша, олар балкондарын жабық етіп қайта жасауды көшедегі шу мен шаңды азайту үшін қолға алған.

Қала әкімдігінің мәліметінше, бұзылатын балкон иелеріне алдын ала ғимаратты бастапқы қалпына келтіру жұмыстары туралы ресми хабарлама табысталады. Кейде жұмысшылар келген кезде пәтер иелерінің үйде болмауы қиындық туғызғанымен, әкімдік заңсыз салынған және тиісті нұсқама берілген барлық балкон міндетті түрде сүрілетінін мәлімдеді.

Муниципалдық билік балкондардың бастапқы құрылымына енгізілген басқа да өзгерістермен, мысалы, қоршаулар мен шатырларды орнатумен де күресіп жатыр. Мұндай құрылымдар көбіне пәтер ішін сырт көзден жасыру үшін тұрғызылған.

Бішкектегі демонтаж жұмыстары Қырғызстанның 2026 жылдың жаз аяғында өтеді деп жоспарланған Шанхай ынтымақтастық ұйымының саммиті мен Көшпенділер ойындарына дайындық аясында жүргізіліп жатыр. Дегенмен қала әкімдігі халықаралық іс-шараларға қарамастан заңсыз балкондарды бұзу тұрақты түрде жалғасатынын айтты.

Астанада 2030 жылға дейін сүрілетін үйлердің тізімі бекітілді

Қалалық бастама қоғамда қызу пікірталас туғызды. Кейбір тұрғындар жұмысшылардың әрекетіне наразылық білдіріп, бір жағдайда құрылыс қалдықтары пәтер иесі үйде болмаған кезде оның қонақ бөлмесіне тасталғанын хабарлады.

Әлеуметтік желілерде де пікір екіге жарылды. Бірі әкімдіктің қаланың сәулеттік үйлесімін қалпына келтіру әрекетін қолдаса, енді бірі қаланы «жансыз кеңестік эстетикаға» қайтаруды сынға алды.

Instagram желісіндегі қолданушылардың бірі ескі көпқабатты үйлерді студенттер жатақханасына теңеп: «Бұл пәтерлерде тұрғындар емес, бүкіл қалада тек студенттер тұратын сияқты әсер қалдырады», деп жазды.