Биыл ардагерлерге 12,6 млрд теңге арнаулы мемлекеттік жәрдемақы төленді

2025 жылғы 1 қазандағы деректер бойынша елімізде 79 313 ардагер тұрады. Мемлекет бұл азаматтарға ерекше қамқорлық көрсетіп, арнаулы мемлекеттік жәрдемақылар мен әлеуметтік төлемдер төлеуді жалғастырып отыр. Биыл осы мақсаттарға республикалық бюджеттен 17 млрд теңге қарастырылған, деп хабарлайды Egemen.kz.

Фото: Ерлан Омар

Еңбек және халықты әлеуметтік қорғау министрлігінің мәліметінше, олардың ішінде Ұлы Отан соғысының 86 ардагері, жеңілдіктер бойынша ҰОС ардагерлеріне теңестірілген – 16 556 адам, өзге мемлекеттердің аумағындағы ұрыс қимылдарының ардагерлері – 26 587 адам және ҰОС жылдарында тылда еңбек еткен – 36 084 азамат бар. 2025 жылы осы санаттағы тұлғаларға 12,6 млрд теңге көлемінде арнаулы мемлекеттік жәрдемақы төленді. 

Естеріңізге сала кетейік, республикалық бюджет есебінен төленетін ай сайынғы арнаулы мемлекеттік жәрдемақы ардагерлердің барлық санатына, өзге әлеуметтік төлемдеріне қарамастан, белгіленген мөлшерде беріледі.

2025 жылы төлемдердің көлемі төмендегідей бекітілді:

1. ҰОС ардагерлері – 16 АЕК (2025 жылы – 62 912 теңге);

2. жеңілдіктері бойынша ҰОС ардагерлеріне теңестірілген ардагерлер, олардың ішінде:

ҰОС кезеңінде жарақат алуы, контузия алуы, мертігуі немесе ауру салдарынан мүгедектігі бар адамдарға жеңілдіктер бойынша теңестірілген адамдар – 7,55 АЕК (2025 жылы – 29 687 теңге); жеңілдіктер бойынша ҰОС қатысушыларына теңестірілген тұлғалар – 6,19 АЕК (2025 жылы – 24 339 теңге);

3. басқа мемлекеттердің аумағындағы ұрыс қимылдарының ардагерлері, оның ішінде:

Ауғанстандағы ұрыс қимылдарына қатысушылар – 6,19 АЕК (2025 жылы – 24 339 теңге); Тәжік-Ауған учаскесінде ТМД шекарасын қорғауды күшейту жөніндегі міндеттерді орындаған, Ирактағы халықаралық бітімгершілік операцияға, Таулы Қарабақтағы этносаралық қақтығысты реттеуге қатысқан әскери қызметшілер – 4,8 АЕК (2025 жылы – 18 874 теңге);

4. ҰОС жылдарындағы тыл еңбеккерлері – 2,13 АЕК (2025 жылы – 8 376 теңге).