Биыл елімізде 10 жаңа өнеркәсіп өнімі шығарылмақ

2025 жылдың қорытындысы бойынша, еліміздегі өңдеу өнеркәсібінің өндірісі 6,4%-ға өсті, – деп хабарлайды Aikyn.kz сайты Өнеркәсіп және құрылыс министрлігіне сілтеме жасап.

Мемлекет басшысы Қасым-Жомарт Токаев тапсырмасы бойынша, өңдеу өнеркәсібін дамытуға және жоғары қосылған құны бар өнім өндірісіне ерекше көңіл бөлу жөніндегі тапсырмалары аясында Қазақстанда шикізаттық секторға тәуелділікті төмендетуге және технологиялық тұрғыдан күрделі салаларды дамытуға бағытталған экономиканың құрылымдық трансформациясы жалғасып жатыр.

Министрліктің мәліметінше, негізгі шикізатты терең өңдеу және жергілікті өндірісті дамытуға басымдық бере отырып, жүйелі жұмыс жүргізілуде.

 Өңдеу өнеркәсібі тау-кен секторынан озды

 Қазақстанда өңдеу өнеркәсібі жыл сайын тұрақты түрде өсіп келеді. 2024 жылдан бастап бұл саланың үлесі 11,9%-ға жетіп, тау-кен секторынан асып түсті. Бұл өсім негізгі экономикалық секторлар арасындағы құрылымдық өзгеріске әкелді.

2025 жылдың қорытындысы бойынша, өңдеу өнеркәсібінің жалпы ішкі өнімдегі үлесі 12,7%-ға жетті. Өсім металлургия, машина жасау, химия өнеркәсібі, құрылыс материалдарын өндіру, резеңке және пластмасса бұйымдары, сондай-ақ жеңіл өнеркәсіп салалары есебінен қамтамасыз етілді.

Жалпы алғанда, 2025 жылы өңдеу өнеркәсібінің өндірісі 6,4%-ға өсті. Атап айтқанда:

металлургия – 1,2%

машина жасау – 12,9%

химия өнеркәсібі – 9,8%

құрылыс материалдары – 9,7%

жеңіл өнеркәсіп – 13,2%

резеңке және пластмасса бұйымдары – 7,6%

дайын металл бұйымдары – 13,6%.

Мысалы, құрылыс материалдары сегментін тармақтап айтсақ, бетон – 0,8%-ға, құрылыс ерітіндісі – 9,5%-ға, әк – 7%-ға, отқа төзімді бұйым – 3,5%-ға, цемент – 17,2%-ға, темірбетоннан жасалған құрастырмалы құрылыс конструкциялары  2,4%-ға артқанын байқауға болады.

 Жаңа өндірістер іске қосылмақ

 Өнімділікті арттыруға, экономиканың технологиялық деңгейін көтеруге және қайта өңдеу деңгейіндегі өнім шығаруға жағдай жасауға бағытталған өнеркәсіптік саясатты іске асыру аясында 2025 жылы жалпы сомасы 1,5 трлн теңгеге 190 жоба іске қосылып, 22,5 мың тұрақты жұмыс орны ашылды. Оның ішінде 6,7 мың жұмыс орны ауылдық жерлерде, ал 1,5 мыңы моноқалаларда ашылды. Жобалар толық қуатына шыққаннан кейін олардың жалпы өндіріс көлемі шамамен 2,3 трлн теңгеге жетті. Сонымен қатар  0,8 трлн теңге көлемінде экспорт жоспарланып, импортты алмастыру көлемі 1,5 трлн теңгеге жетті.

2025 жылы сондай-ақ Қазақстан аумағында бұрын өндірілмеген 10-нан астам жаңа өнімнің өндірісі жолға қойылды. Машина жасау саласында локомотивтердің тірек арқалықтары, көлік құралдарының шатыр және бүйір қаптамалары, жетекші көпірдің арқалығы, цилиндр блогы, жұмыс турбиналарының қалақшасы, жылу электр стансалары турбиналарының корпус бөлшектері, кері осмос мембраналық элементтері және глюкометрлер өндіріле бастады. Сонымен қатар елімізде алғаш рет сұйық өнімдерге арналған Pure-Pak картон қаптамасының өндірісі жолға қойылып, бұл импортты толықтай алмастырып жатыр. 

Ал биыл Үкімет шамамен 1,7 трлн теңге сомасына 200 жобаны іске асыруды жоспарға қойған. Соның арқасында халықтың 19,1 мың тұрақты жұмыс орны  ашылады. Сондай-ақ биыл Қазақстан бұрын өндірілмеген 10 жаңа өнімді шығаруды жоспарлап отыр. Олардың ішінде:

самосвалдар (8×4, 90t, 105t)

автобетон араластырғыштар

автокран-манипулятор

автогрейдер

фронтальды тиегіш

жаңартылатын энергия көздеріне арналған трансформатор.

Химия саласында сутек пен натрий сульфатын өндіру жоспарланған.