Bloomberg басылымы Алматы қаласын 25 үздік туристік бағыттың тізіміне енгізді

Халықаралық беделді Bloomberg басылымы Алматы қаласын 2026 жылы баруға тұрарлық әлемдегі 25 үздік туристік бағыттың тізіміне енгізді.

Мегаполис - аталған рейтингке Қазақстаннан кірген жалғыз қала. Халықаралық деңгейдегі бұл көрсеткіш Алматының елдің басты туристік орталығы екенін тағы бір мәрте дәлелдей түсті. Туризм басқармасының мәліметінше, биыл мегаполиске келген шетелдік саяхатшылардың саны былтырға қарағанда 11 пайызға артқан. Өзге елден келген қонақтар оңтүстік шаһардың тек әсем табиғатына тамсанып қана қоймай, қазақтың мәдениеті, өнері  мен тарихынан сыр шертетін мұражайларға баруды жөн санайды.

Bloomberg басылымы Алматы қаласының мәдени өмірін, бай тарихи мұрасын, дамыған гастрономиясы мен табиғатқа жақын орналасуын ерекше атап өткен. Бұл еліміздің әлемдік туристік ортада бәсекеге қабілеттілігінің артқанын көрсетеді. Биыл 9 айда Алматыға 1 млн 869 мың турист келген. Олардың ішінде 600 мыңға жуығы шетелдіктер. Мегаполистің көрікті жерлерін көруге келген ішкі туристердің саны 1 млн 300 мыңға жуық. Саяхатшылар санының артуына қала инфрақұрылымның жақсаруы мен қонақтарға арналған заманауи цифрлық қызметтердің енгізілуі оң әсер етуде.

Дәурен Ерғалиев, Қалалық туристік инфрақұрылымды дамыту бөлімінің басшысы:

- Таулы аймақтардағы 1000 шақырымнан астам туристік бағыт цифрландырылып, 850 шақырымнан астамы абаттандырылды. 13 кемпинг аймағы құрылып, маршруттар навигациялық платформаларға интеграцияланды. Бұл туристерге бағытқа алдын ала дайындалуға мүмкіндік береді. Жоғары таулы аймақтарда әйенекпен қоршалған беседкалар, күн панельдерін орнатуды қолға алып жатырмыз.

Шетелдік қонақтар көбіне Медеу мұз айдыны, Шымбұлақ тау шаңғы курорты мен көрікті Көктөбеге барады. Сондай-ақ шаһардағы музейлер – шетелдік қонақтар ең көп тоқтайтын орындардың бірі. Мәселен, Ұлттық Орталық музейге биыл 60 мыңға жуық шетелдік қонақ келген. Олар көбіне Қытай, Оңтүстік Корея, Үндістан елдерінің азаматтары.

Бибіфатима Бақдәулетова, ҚР Ұлттық орталық музейдің экскурсия бөлімінің жетекшісі:

- Шетелдіктер көшпелі мәдениетке, оның ішінде біздің қазақтардың мәдениетіне көп қызығушылық танытады. Сонымен қатар мына көне тарихтағы осы жерді мекен еткен сақ тайпаларының, көбісі біздің музейімізге келген кезде Алтын Адамның реконструкциясына қарап таңғалып жатады. Оның киіміндегі алтыннан жасалған түрлі әшекей бұйымдардың оның жасалу техникасына, стиліне таңданып жатады.

Кризельда Пауль, турист:

- Мен анаммен бірге Қазақстанға саяхаттап келдім. Біз мұнда бір апта болуды жоспарлап отырмыз. Қазір Қазақстанда жүргенімізге бесінші  күн. Біз қазірдің өзінде бірнеше экскурсияға қатысып, сіздердің көлдеріңізге тәнті болдық. Білесіз бе, анам өмірінде алғаш рет қар көрді! Ауа райы туралы айтар болсақ, әрине, өте суық.

Франциялық Дрис Реджичидің Алматыға екінші рет келуі. Әр келген сайын Алматыны жаңа қырынан тани түсемін, - дейді ол. Еліміздің тарихы мен мәдениетін ерекше бағалаған оның, қазақ тілін зерттеуге қызығушылығы оянған. Дристің мамандығы журналист.

Дрис Реджичи, турист:

– Әсіресе мені көне қазақ әшекей-бұйымдарының көрмесі қатты таңғалдырды. Ол бізге Қазақстан тарихына терең үңіліп, көшпелі өмірдің қандай болғанын және сол кездегі адамдардың қандай ғажайып заттар жасай алғанын көруге мүмкіндік берді.

Мегаполиске келген туристер сондай-ақ Алматыдағы жаңадан ашылған заманауи өнер музейі, Әбілхан Қастеев атындағы мемлекеттік өнер музейіне жиі бас сұғады.

Авторлары: Гүлжан Айнабекова, Сержан Жұмабаев