Боао Азия форумына қатысты

Egemen.KZ парақшасынан алынған ақпаратқа сәйкес, Qazaq24.com хабарлайды..

Премьер-министрдің бірінші орынбасары Роман Скляр Боао Азия форумының 25-конференциясына қатысып, елдің ашық экономика мен орнықты даму қағидаттарына бейілділігін растады.

Сурет: primeminister.kz

Форум аясында көлік-логистикалық байланыстарды кеңейту, инвестициялық ынтымақтастықты күшейту мен бірлескен өнеркәсіптік жобаларды дамыту мәселелері талқыланды. Сондай-ақ Қытайдың Хайнань провинциясымен өңіраралық әріптестікті тереңдету жолдары қарастырылды. Ауқымды жиынға Сингапур Премьер-министрі Лоуренс Вонг, Әзербайжан Милли Мәжілісінің төрағасы Сагиба Гафарова, Шри-Ланка Парламентінің спикері Джагат Викрамаратне мен әлемнің 60-тан астам елінен келген жоғары деңгейдегі өкілдер қатысты.

Маңызды іс-шара аясында Роман Скляр Бүкілқытайлық халық өкілдері жиналысы Тұрақты комитетінің төрағасы Чжао Лэцзимен арнайы кездесіп, пікір алмасты. Чжао Лэцзи қытай тарапы елімізбен мәңгілік жан-жақты стратегиялық әріптестіктің жоғары сенімге негізделген қатынастарына айрықша мән беретініне тоқталды. Бұған қоса, елімізде жүргізіліп жатқан реформалар мен Мемлекет басшысы Қасым-Жомарт Тоқаевтың елдің одан әрі өркендеуіне бағытталған бастамаларына қолдау білдірді.

Форумды Боао Азия форумының директорлар кеңесінің төрағасы Пан Ги Мун ашып, жаһандық геосаяси шиеленіс, қарулы қақтығыстардың көбеюі мен орнықты дамуға төнген қауіптер жағдайында халықаралық қоғамдастық күш-жігерін біріктірудің маңызы туралы айтты. Өзара сенімді нығайту, өңірлік интеграцияны тереңдету мен әлемдік экономиканың ашықтығын сақтау мәселелеріне басымдық берілді.

«Жоғары деңгейдегі диалог: жаһандық белгісіздік жағдайына айқындық енгізу» сессиясында сөз сөйлеген Роман Скляр еліміз ашық экономика қағидатына берік екенін жеткізді. Ол халықаралық ынтымақтастықты күшейту, көлік-логистикалық дәліздерді дамыту мен Азия мен Еуропа арасындағы сенімді транзиттік хаб ретіндегі елдің рөлін арттыру мәселелеріне тоқталды. Бұған қоса жаһандық экономикалық сын-қатерлерге бірлесіп жауап іздеу қажеттігіне назар аударды.

Жұмыс сапары барысында Роман Скляр Хайнань провинциясы халық үкіметінің төрағасы Лю Сяоминмен кездесті. Кездесуде сауда-экономикалық және инвестициялық байланыстарды кеңейту, туризм мен мәдени-гуманитарлық ынтымақтастықты дамыту, тікелей әуе қатынасын жолға қою мен өңіраралық ықпалдастықты арттыру мәселелері талқыланды. Роман Скляр еліміз индустриялық аймақтар мен көлік-логистикалық инфрақұрылымды дамыту бағытындағы бірлескен жобаларды жүзеге асыруға қолайлы жағдай жасап отырғанын айтты.

Өз кезегінде Лю Сяомин Хайнань провинциясы Қазақстанмен өзара іс-қимылды кеңейтуге мүдделі екенін жеткізіп, өңірлер арасындағы байланысты нығайтуға дайын екенін білдірді.

Сапар аясында Роман Скляр жетекші қытай компанияларының басшыларымен кездесіп, мұнай-газ, мұнай-химия мен көмір химиясы, металлургия, машина жасау салаларындағы инвестициялық ынтымақтастықтың келешегін талқылады. Тараптар жүзеге асырылып жатқан жобалардың жай-күйін қарастырып, өндірістік кооперацияны кеңейту мүмкіндіктерін саралады.

Роман Скляр жаңа Конституциялық өзгерістер инвестициялық әріптестікті жандандыруға әрі бірлескен ірі жобаларды іске асыруға қосымша мүмкіндік беретінін атап өтті. Ол Үкімет бірлескен бастамаларды қолдауға әрі олардың тиімді жүзеге асуына қажетті жағдай жасауға дайын екенін жеткізді.

Кездесу қорытындысында қытайлық компаниялар өндірістік әрі технологиялық кооперацияны кеңейтуге, сондай-ақ Қазақстан аумағында өнім өндіруді жергіліктендіру деңгейін арттыруға ниетті екенін растады.

Соңғы жаңалықтар