Болашақ бойынша 340 стипендия заң бұзу арқылы тағайындалған

АСТАНА, 27 сәуір-Sputnik. Жоғары аудиторлық палата "Болашақ" білім беру бағдарламасы бойынша стипендия тағайындауда заң бұзушылықтарды анықтады.

Белгілі болғандай, 150-ден астам стипендия шектен тыс тағайындалған.

"Іріктеу талаптарына сәйкес келмесе де, министрліктің шешімімен 340 үміткерге 7,7 млрд теңгеге стипендия тағайындалған. Сонымен қатар 151 стипендия бекітілген шектен тыс тағайындалған", - деді палата мүшесі Тілеген Қаскин.

Оның айтуынша, жасанды интеллект бойынша жоспарланған 54 стипендияның тек 5-і ғана беріліп, қалған 49-ы басқа бағыттарға қайта бөлінген.

Аудиторлар жатақханаларда орын бөлуде де заң бұзушылықтар анықтады: министрлік пен оператор деректерінде сәйкессіздік пен алшақтық үлкен.

"Жатақханалардағы орын тапшылығы 2024-2025 оқу жылдары 10 мыңнан асқан. Ал министрлік пен оператордың деректері арасындағы алшақтық 31 мыңнан асып кеткен”, - дейді аудитор.

Қаскиннің айтуынша, жатын орынмен қамтамасыз ету бұрынғы 70%-дан да төмен: ЕҰУ - 51,7%, ҚазҰУ - 56,7%. Ал ҚазҰУ мен ЕНУ әкімшілік қажеттіліктер үшін 133 млн теңгеден астам қаражатқа автокөлік сатып алған.

Бүгінгі таңда жоғары білім беру жүйесі нәтижеге қарағанда процесті көбірек қаржыландырады, дейді аудиторлар.