БҚО да инвестиция тартудың жаңа тетігі жүзеге аспақ

Батыс Қазақстан облысындағы «Ақжайық» индустриялық аймағында инвестиция тартудың жаңа тетігі іске қосылмақ.

«Қолжетімділік үшін төлем» атты пилоттық жоба индустриялық аймақтарды жедел дамытуға және инвесторлар үшін қолайлы жағдай қалыптастыруға бағытталған. Яғни инженерлік инфрақұрылым инвестор есебінен салынады, кейін шығындар осы аймақты жалға алған өзге де кәсіпкерлер мен мемлекет тарапынан кезең-кезеңімен өтеледі. Бүгін облыс әкімдігі мен инвестициялық компания және аталған индустриялды аймақта 34 мегаваттық газотурбиналық электр стансасын салуды көздеп отырған қытайлық инвестор арасында 3 жақты меморандумға қол қойылды. Қазақстандық инвестциялық компания өкілдері келешекте осы жерде жалпы құны 370 млн доллар болатын 17 жоба жүзеге асатынын айтады. Мамандардың мәлімдеуінше, инвесторлардың Орал өңірін таңдауының бірнеше себебі бар.

Сұлтанғали Кенжеқұлов, Инвестициялық компанияның басқарма төрағасы:

- Өнеркәсіптік жағынан өте дамыған, жалпы бұрыннан келе жатқан тарихи потенциалы үлкен. Екіншіден, логистикалық жағынан да Ресейге жақын, Еуропаға да Үшіншіден, осы облыста газ көп, 99% газдандырылған. Төртіншіден, газ бағасы өте төмен. Сол үшін инвесторлар осы маңға келуге дайын.

Нариман Төреғалиев, БҚО әкімі:

- Индустриялды аймақ Теректі ауданында орналасқан. Ол жерде 281 гектар жер бөлінген. «Қазақинвест» инвесторлар тауып әкелуге көмектеседі. Сонымен қатар мемлекеттік орталық органдармен қандай да бір қарым-қатынаста көмек керек болғанда осы ивесторларға көмектесетін болады. Біздің міндетіміз жергілікті атқарушы органдардың индустриялды аймағымызды тиісті инвест жобаларды жүзеге асыруға дайындап беру.