БҚО да жалған инвесткомпания әшкереленді

Оралда жалған жарнама беріп, тұрғындарды жоғары табысқа қарық қылам деген алаяқтардың әрекеті әшкереленді.

Батыс Қазақстан облысының экономикалық тергеп-тексеру департаменті «Imrat Group» атты қаржы пирамидасының қызметін тоқтатты. Канада, Гонконг және Ұлыбританияның атынан тіркелген жалған компания  азаматтарға күнделікті 0,5%-дан 1,5%-ға дейін инвестициялық табыс уәде еткен. Ол үшін салымшылар арнайы реферальды сілтеме арқылы тіркеліп, криптовалюта әмиянына 20-дан 10 000 долларға дейін аударуы қажет болған. Алайда шын мәнінде салымдар тек пирамида ішіндегі қатысушылар арасында қайта бөлініп отырған. Жалпы жыл басынан бері елде қаржы пирамидасына қатысты 90 іс тергеліп, 7 миллиард теңге көлемінде залал өтелген.

Лаура Оразғалиева, Экономикалық тергеп-тексеру департаментінің аға тергеушісі:

- Заңсыз қызмет дер кезінде тоқтатылғанының арқасында пирамидаға барлығы 30 азамат тартылған. Олардың салған қаражаты 89 млн теңгеден асады. Қылмыстық іс сотқа жолданды. ҚР Қылмыстық-процестік кодексінің 201-бабына сәйкес өзге ақпарат жария етілмейді.