Астанада Си Цзиньпин Ел басқару жөнінде кітабының V томының таныстырылымы өтті

15 шілде күні Астанада «Си Цзиньпин Ел басқару жөнінде» кітабының бесінші томының таныстырылымы өтті. Іс-шараны ҚХР Мемлекеттік кеңесінің Баспасөз-канцеляриясы, Қытайдың халықаралық баспа тобы және Қытай Халық Республикасының Қазақстандағы Елшілігі бірлесіп ұйымдастырды. Салтанатты жиынға Қытай мен Қазақстанның саяси партиялары мен сараптамалық орталықтарының өкілдері, сондай-ақ өзге де салалардың өкілдері қатысты, - деп хабарлайды Aikyn.kz.

Қатысушылар Қытай мен Қазақстан, сондай-ақ Қытай мен Орталық Азия елдері арасындағы өзара түсіністік пен ынтымақтастықты, гуманитарлық және сарапшылық алмасуды тереңдету тұрғысынан бұл кітаптың маңызы зор екенін ерекше атап өтті.

Қазақстандағы Қытай елшілігінің уақытша сенімді өкілі Чэн Кэфаньнің айтуынша, Си Цзиньпиннің жаңа дәуірдегі социализм туралы идеялары маркстік теорияны Қытайдың нақты болмысымен және дәстүрлі қытай мәдениетінің озық құндылықтарымен ұштастырады. 

– Бұл – XXI ғасырдағы заманауи марксизмнің көрінісі әрі марксизмді қытайландыру процесіндегі жаңа белес. Аталған еңбек осы идеялардың қалыптасу, даму және толығу процесін жан-жақты ашып көрсететін құнды дереккөз. Нақтырақ айтсам, Қытай Коммунистік партиясының мемлекеттік басқару философиясын, елдің даму стратегиясын, құндылықтар жүйесі мен жаһандық жауапкершілік қағидаттарын түсінуге мүмкіндік беретін «алтын кілт», - деді ол.

Сондай-ақ Чэн Кэфань Қытай тарапы осы бесінші томның жарық көруін мемлекеттік басқару саласында тәжірибе алмасуды тереңдетуге, даму стратегияларын өзара үйлестіруге, «Бір белдеу, бір жол» бастамасын одан әрі дамытуға және екіжақты ынтымақтастықты жаңа белеске көтеруге мүмкіндік ретінде қарастыратынын айтты. 

– Мұның бәрі екі ел арасындағы қарым-қатынастың жаңа «алтын отыз жылдығын» қалыптастыруға және тағдыры ортақ қоғамдастықты одан әрі нығайтуға бағытталған, - деді ол.

«Си Цзиньпиннің мемлекеттік басқару туралы» кітабының бесінші томына Қытай Халық Республикасының Төрағасы Си Цзиньпиннің 2022 жылғы мамырдан 2024 жылғы желтоқсанға дейінгі аралықта жарияланған 91 маңызды еңбегі енген. Бұл туралы Шетел тілдеріндегі әдебиеттер баспасының бас редакторы Мо Гаои айтып берді.

 – Бұл еңбектерде Қытайды жаңғыртудың жаңа даму кезеңіндегі теориясы мен практикасы жүйелі түрде баяндалып, адамзаттың тағдыры ортақ қоғамдастығын құру жөніндегі Қытайдың көзқарасы мен ұстанымы жан-жақты көрсетілген. Сондай-ақ халықаралық қауымдастыққа жаңа дәуірдегі Қытайды және Қытай Коммунистік партиясын тереңірек түсінуге мүмкіндік береді. Кітапта «халық бәрінен биік, барлық іс халық игілігі үшін жасалуы тиіс» деген қағидатқа негізделген Қытайдың даму тұжырымдамасы кеңінен түсіндірілген, - деп нақтылады Мо Гаои.

Сонымен қатар жиынға ҚР Президенті Әкімшілігінің Ішкі саясат бөлімінің меңгерушісі Елнұр Бейсенбаев қатысты. Ол да бұл еңбектің қазақстандық оқырмандар үшін мән-маңызы зор екеніне тоқталды. 

– Бұл көлемді кітап – Қытай мемлекетінің саяси даму бағытын, мемлекеттік басқару тәжірибесін, ұлттық бірлік пен тұрақтылықты қамтамасыз ету ұстанымдарын, сондай-ақ ұзақ мерзімді стратегиялық мақсаттарын тереңірек түсінуге ұмтылатын қазақстандық оқырмандар үшін маңызды әрі құнды дереккөз.

Қазақстан мен Қытайдың мемлекеттік даму модельдерінің өзіндік ерекшеліктері болғанымен, екі елді жақындастыратын ортақ қағидаттар да аз емес. Екі мемлекет те реформаларды кезең-кезеңімен жүзеге асыру, ұлттық ерекшеліктерді ескере отырып жаңғыру және орнықты дамуды қамтамасыз ету қағидаттарын ұстанады, - деді ол.

Осы ретте Елнұр Бейсенбаев Қазақстан Президенті Қасым-Жомарт Кемелұлы Тоқаевтың бастамасымен жүзеге асырылып жатқан саяси және экономикалық реформалар тиімді мемлекеттік басқару жүйесін қалыптастыруға, заң үстемдігін нығайтуға, мемлекеттік аппараттың ашықтығы мен есептілігін арттыруға бағытталғанын атап өтті.

– Вице-президент, Қазақстан халық кеңесі институттарының енгізілуі, Құрылтайдың жаңғыртылуы сияқты саяси реформалар, сондай-ақ терең саяси трансформация мен халық бірлігін нығайтуға бағытталған ортақ ұстанымдар екі елдің тәжірибесін жақындастыра түседі.  Бұл тұрғыда Қазақстан мен Қытай арасында мемлекеттік басқару тәжірибесі, цифрлық трансформация, мемлекеттік қызметтің тиімділігі және басқару мәдениеті салаларындағы өзара тәжірибе алмасудың маңызы арта түсуде. Бүгінгі «Мемлекеттік басқару туралы» кітабының бесінші томының жарық көруі саясаттанушылар, халықаралық қатынастар саласының мамандары, ғылыми қауымдастық, студенттер, сондай-ақ Қытайдың тілі, мәдениеті мен қоғамдық-саяси дамуын зерттеушілер үшін маңызды оқиға екеніне сенімдімін, - деді Елнұр Бейсенбаев.

Шара соңында Қытай тарапының өкілдері Қазақстан өкілдеріне «Си Цзиньпин Ел басқару жөнінде» кітабының бесінші томын салтанатты түрде табыстады.