“Толық тұрақтандыру туралы айту ерте“ Ұлттық банк басшысы Қазақстандағы инфляция туралы

Қазақстанда жылдық инфляция тоғыз ай қатарынан төмендеп, маусымның қорытындысы бойынша 10,3 пайыз болды. Бұл туралы Үкімет отырысында Ұлттық банк төрағасы Тимур Сүлейменов мәлімдеді, - деп хабарлайды Tengrinews.kz.

Ұлттық банк басшысының айтуынша, ақша-кредит және экономикалық саясат шараларының кешені инфляцияның баяулауына ықпал еткен.

"Жылдық инфляция тоғыз ай қатарынан төмендеп келеді және биылғы маусымда 10,3 пайыз болды", - деді Сүлейменов.

Ұлттық банк басшысы 5 маусымда реттеуші базалық мөлшерлемені 18 пайыздан 17 пайызға дейін төмендеткенін еске салды.

Сонымен қатар, оның айтуынша, бағаның толық тұрақтанғаны туралы айту әлі ерте.

"Инфляция әзірге екі таңбалы деңгейде қалып отыр, сондықтан толық тұрақтану туралы айтуға ерте", - деді Сүлейменов.

Маусымдағы айлық инфляция 0,8 пайыз болды.

Инфляцияны одан әрі төмендету үшін, Ұлттық банк басшысының айтуынша, ТҮКШ тарифтері мен ЖЖМ бағасын көтеру бағдарламаларын бақылаулы түрде іске асыру, тапшылықты және Ұлттық қордан бөлінетін трансферттерді ұлғайтпайтын ұстамды бюджет саясаты, сондай-ақ отандық тауарлар ұсынысын арттыра отырып, тиімді квазифискалдық ынталандыру қажет.

Сыртқы тәуекелдердің қатарында Сүлейменов сақталып отырған геосаяси шиеленіс пен азық-түліктің әлемдік бағасының өсуін атап өтті.

Бұған дейін Ұлттық банк төрағасы Тимур Сүлейменов Қазақстанда инфляция біртіндеп баяулап жатқанын мәлімдеген болатын. Оның айтуынша, 2026 жылдың қорытындысы бойынша реттеуші баға өсімін 9–12 пайыз аралығында күтеді, алайда көрсеткіштің 10 пайыздан төмен болуына қол жеткізу үшін қатаң ақша-кредит саясатын сақтау және инфляцияны тежеу бойынша Үкімет пен Ұлттық банктің бірлескен жұмысы талап етіледі.

Google News арқылы жаңалықтарымызды қадағалаңыз