БҚО Мемлекеттік кірістер департаменті басшыларының бірі ұсталды

Батыс Қазақстан облысы Мемлекеттік кірістер департаменті (МКД) басшыларының бірі ұсталды, деп хабарлайды Ұлттық қауіпсіздік комитетінің (ҰҚК) баспасөз қызметі.

«ҰҚК Сыбайлас жемқорлыққа қарсы іс-қимыл қызметі мемлекеттік шекара арқылы тауарларды заңсыз импорттау арнасының жолын кесті. Соттың санкциясымен Батыс Қазақстан облысы Мемлекеттік кірістер департаменті басқарма басшыларының бірі мен елорда тұрғыны ұсталып, қамауға алынды», — делінген дүйсенбіде таралған хабарламада.

Арнайы қызметтің нұсқасы бойынша, «аталған тұлғалар ақшалай сыйақы үшін шетелдік азаматтарға халық тұтынатын тауарларды елге кедергісіз әкелуге көмектескен».

«Олардың 100 миллион теңгеден астам сомада пара алғаны процессуалдық түрде құжатталды. Алдын ала есептеулер бойынша, мемлекетке келтірілген шығын 1,9 миллиард теңгені құрады», — деп толықтырды ҰҚК өкілдері.