Бұдан былай зейнетақы аударымының 5% ы жұмысшының жеке шотына түсуі мүмкін

2024 жылғы 1 қаңтардан бастап жұмыс берушілер міндетті 10%-дық зейнетақы төлемінен бөлек өз қаражаты есебінен жұмысшының Бірыңғай жинақтаушы зейнетақы қорындағы шотына қосымша жарна аударуға міндеттелген. Алғашқы жылы зейнетақы жарнасының мөлшері жалақының 1,5 процентін құраса, 2028 жылға дейін кезең-кезеңімен 5 процентке дейін көтеріледі. Бүгін Мәжіліс кулуарында депутат Асхат Аймағамбетов сол 5 пайыздың 4 пайызын азаматтардың жеке шотына аудару ұсынысын тарқата айтты, деп жазады Egemen.kz.

Фото: egemen.kz/ Ерлан Омар

Бастапқы жоспар бойынша жұмыс берушінің өз қаражата есебінен жұмысшының Бірыңғай жинақтаушы зейнетақы қорындағы шотына 2024 жылы – 1,5%, 2025 жылы – 2,5%, 2026 жылы – 3,5%, 2027 жылы – 4,5%, 2028 жылы – 5,0% аудару міндеті қойылған. 

Мәжілісмен А.Аймағамбетов қаржы сарапшыларының пікірлерін алға тарта отырып, аталған 5 пайыздың 4 пайызын азаматтардың жеке шотына аудару ұсынысын көтергенін жеткізді.

«Қазір Бірыңғай зейнетақы қорына әрқайсысымыздың жалақымыздан 10 пайыз аударым міндетті түрде жасалады. Былтыр жұмыс берушілер де өз қаражатынан аударым жасауға міндеттелді. Енді біз және қаржыгерлер осы қосымша жұмыс берушілердің төлейтін 5 пайызының 4 пайызын әр адамның жеке шотына берсе дейміз. 1 пайызын жалпы қорға аударуды ұсынамыз. Өйткені елімізде жалақы алмайтын азаматтар да бар. Оларға да зейнетақы төленуі керек. Мәселен,  қазір сіз БАҚ-та қызмет етіп жүрсеңіз әр жалақыңыздың  10 пайызы БЖЗҚ-на аударылып жатыр. Оған жұмыс берушінің 5 пайызы да қосылады. Жоғарыда айтқан пікірімізді бұрынғы ұлттық банк қызметкерлері, төрағалары да қолдап отыр. Менің де жеке пікірім осы ұстанымға саяды», деді депутат.