БҰҰ миссиясында Қазақстанның Мемлекеттік туы салтанатты түрде көтерілді

БҰҰ-ның Ливандағы Уақытша күштерінің (UNIFIL) базасында Қазақстан Республикасының Мемлекеттік туын көтеру рәсімі салтанатты түрде өтті, – деп хабарлайды Aikyn.kz сайты.

Іс-шараға үнді батальонының командирі полковник Прасун Сингх, батальонның әскери қызметшілері, сондай-ақ қазақстандық бітімгерлер контингентінің командирі аға лейтенант Талғат Исмайылов пен ұлттық құрамның барлық мүшесі қатысты.

Салтанатты рәсім барысында полковник Прасун Сингх база аумағында Қазақстан Республикасының Мемлекеттік туын ресми түрде көтерді. Қазақстан, Үндістан және Біріккен Ұлттар Ұйымының әнұрандары орындалғаннан кейін үнді батальонының командирі қазақстандық бітімгерлерді құттықтап, алдағы қызметтеріне сәттілік тіледі. Сонымен қатар, ол ұлттық контингент командиріне UNIFIL миссиясының естелік белгісін табыстады.

Мемлекеттік туды көтеру рәсімі – UNIFIL миссиясының дәстүрлерінің бірі. Бұл рәсім ұлттық контингенттің база аумағында ресми түрде қызметін бастағанын білдіреді және олардың халықаралық міндеттерді орындауға дайын екенінің белгісі саналады.

Қазақстаннан 11 бітімгер Ливанға БҰҰ-ның Уақытша күштері (UNIFIL) құрамында қызмет атқару үшін барғанын естеріңізге саламыз. Олар алты ай бойы бітімгерлік міндеттерін орындайды.