Римде Абайдың бюсті салтанатты түрде ашылды

Италияның қақ төріне қазақтың Ұлы ақыны Абайдың мүсіні қойылды.

Бүгін ел астанасы Римде ескерткіштің ашылу салтанаты өтті. Айтулы шараға мәдениет және ақпарат министрі Аида Балаева, Италиядағы Қазақстан Елшісі Ерболат Сембаев, сондай-ақ Италиядағы мәдени-шығармашылық қоғам өкілдері қатысты. 

Қазақтың қара домбырасынан күй шертіліп, жиылған қауым ескерткіштің ашылу сәтін зор қуанышпен қабылдады. Ақ мәрмәр тастан қашалып жасалған ақынның бейнесі - даналық пен екі ел арасындағы рухани көпірдің белгісі іспетті. Бұл туралы ақпарат және мәдениет министрі Аида Балаева өз сөзінде ерекше атап, Қазақстан мен Италия арасындағы мәдени байланыстың жаңа кезеңі басталғанын тілге тиек етті. 

Аида Балаева, ҚР Мәдениет және ақпарат министрі:

- Абай Құнанбайұлы – қазақ халқының рухани кемелденуіне бағдар болған, адамзаттың асыл мұраттарын насихаттаған ұлы тұлға. Оның шығармаларындағы басты идея –  адамгершілік, әділдік, білім мен еңбек арқылы ізгілікке үндеу. 

Биыл Абай Құнанбайұлының туғанына 180 жыл. Мерейтой мен Қазақстан-Италия басшыларының кездесуі бүгінгі айтулы оқиғаға мұрындық болып отыр. Осы сәттің куәсі болуға арнайы келген мәртебелі меймандардың арасында Италия мәдениет министрілігінің өкілдері, Рим қаласының әкімшілік өкілдері бар. Олар өздерінің Қазақстанға ыстық ықыласын жеткізіп, Абай шығармашылығына деген құрметі мен ілтипатын білдірді. 

Фабио Соколович, Рим қаласы мэрінің дипломатиялық кеңесшісі:

- Қазақтың біртауар ақынының мүсіні Римде қойылғанына өте қуаныштымыз. Бұл Қазақстан мен Италия арасындағы мызғымас қарым-қатынастың ары қарай да дамуына жол ашады. Рим - мәдениеттің орталығы. Мұнда небір ұлы ойшылдар мен суретшілердің мұрасы сақталған. Сондықтан Абай мүсінінің тарихи мекенде қойылуы ерекше символдық мәнге ие. 

Фьоренца Боски, филолог, Абай шығармашылығын зерттеуші: 

- Поэзия арқылы халықтың жанын, жүрек сырын ұғынуға болады. Абай шығармашылығын зерттеуші ретінде, бұл мүсіннің жергілікті тұрғындарға ақын өнерімен танысуға қызығушылығы артатына күмәнім жоқ. Өйткені Абай өлеңдерінің идеясы Батыстағы қауымға жат емес.  

Мүсін каррара мәрмәр тасынан ойылып жасалған. Оның авторы - қазақстандық мүсінші Нұрбол Қалиев. Ал жобаның жүзеге асуына итальялық компания мен Абай облысының әкімдігі, облыстық "Ақертіс" қоры қолдау көрсекен. Сондай-ақ ескерткіштің орны арнайы таңдалып, Париоли ауданының Вилла Грациоли саябағына қойылды. Әрі бұл жерде қырғыз жазушысы Шыңғыс Айтматовқа да арналған ескерткіш бар. Оған министр мен елші мырза гүл шоқтарын қойды.

Ерболат Сембаев, Қазақстанның Италиядағы Елшісі: 

- Биыл Абай атамыздың 180 жылдығы ғой, соңдықтан бұл іс-шара өте маңызды. Алдыңғы жылы біздің президентіміз Қасым-Жомарт Тоқаев Италияға ресми сапармен келіп кетті, биыл осы елдін Премьер-министрі Джорджиа Мелони Қазақстанға барды, одан кейін Президенті Серджо Маттарелла ресми сапар соқты. Сол сапарлардың аясында осындай келісім жасалған. Астанада Марко Полоның көшесі ашылады деп, ал Мәңгілік қала Римде Абай атамыздың мүсіні ашылады деп.

Луиза, La Sapienza Университетінің студенті:

- Мұндай мәдени шаралар ақын шығармашылығымен танысуға құштарлықты оятады. Мен ақын туралы ақпарат іздеп, оның өмір жолы мен өнерімен танысуды бастап кеттім. Мұнда мені қазақстандық құрбым шақырды. Әрі өзім үшін де өте қызық болды. 

Айдана Айтбекқызы, тілші: 

- Қазақтың ұлы ақыны Абай Құнанбайұлына арналған ескерткіш, бюстер әлемнің көп елінде бар. Будапешт, Мәскеу, Париж, Каир, Нью-Дели және өзге де қалалардың саябақтары мен көшелеріне қойылған. Енді міне Мәңгілік қала - Римде де қазақ ойшылына арналған ескерткіш бой түзеді. Вилла Грациоли саябағында орналасқан бұл бюст ақын мұрасына деген құрмет пен Шығыс пен Батыс арасындағы мәдени диалогтың нышаны іспетті. 

Айдана Айтбекқызы, Фариза Жанғанаева, Руслан Өміржан