​Бюджеттің миллиардтарына салынған апатты үйлер: Талғайраң тұрғындарына өтемақы төленді

«Нұрлы жер» мемлекеттік бағдарламасы бойынша 1,7 миллиард теңгеге салынған коттедждердің бір бөлігі апатты деп танылып, сүрілетін болды.

Бұған дейін хабарланғандай, 2018 жылы Талғайраң ауылында салынған коттедж үлгісіндегі 60 үйдің 48-інің қабырғалары сөгіліп, тұрғындардың өміріне қауіп төндіре бастаған еді. Бұл үйлер мемлекеттік бағдарлама аясында салынып, кезекте тұрғандарға ипотека арқылы қолжетімді әрі сапалы баспана ретінде берілген.

Бұл үйлердің құрылысын жүргізген мекемелер: «Азия стройсервис-С» ЖШС — 14 үй; «БатысАльянсСтрой» ЖШС — 34 үй; «Сервис-Партнер» ЖШС — 12 үй.

Дау туындаған соң полиция сотқа дейінгі тергеуді бастады. Ал құрылыс салушы жалдаған мамандар зерттеу жүргізіп, үйдің бұзылуына жерасты сулары, топырақтың шөгуі және басқа да факторлар себеп болғанын алға тартты.

Енді бір қызығы, «Сервис-Партнер» компаниясы ең жауапты мердігер болып шықты. Олар салған 12 коттедждің ешқайсысынан ақау табылмаған (бәлкім, олардың астындағы топырақ пен жерасты «дұрыс» болған шығар). Ал қалған екі құрылыс салушы тұрғызған үйлердің барлығы дерлік жарамсыз болып қалған.

Қала әкімдігінің ақпараты бойынша, «БатысАльянсСтрой» ЖШС үй иелеріне өтемақы төлеп, мәселені шешкен. Бұл ретте жер учаскелері тұрғындардың меншігінде қалды.

Ал «Азия стройсервис-С» ЖШС банкрот болып, өз жұмысын тоқтатқан. Осы мекеме салған тоғыз коттедж апатты деп танылып, сүрілетін болды, ал қалған бес үйге күрделі жөндеу жүргізу үшін сметалық құжаттама әзірленіп жатыр. Мұның бәрі енді мемлекет есебінен жасалатын сияқты. Себебі әкімдіктің мәлімдеуінше, бұзылатын үйлердің иелеріне өтемақы жергілікті атқарушы органдар арқылы төленген.

Атырау облысы Полиция департаменті Тергеу басқармасының бастығы Мұхтар Бектұрғанов «АЖ» редакциясына сотқа дейінгі тергеп-тексеру амалдары әлі де жалғасып жатқанын хабарлады.

Лев ГУЗИКОВ

Бүгін, 12:09