Цифрлық штаб мемлекеттік сервистерді бірыңғай платформаға біріктіруді тапсырды

Премьер-министр Олжас Бектеновтың төрағалығымен өткен Цифрлық штаб отырысында Президент Қасым-Жомарт Тоқаевтың «Жасанды интеллект дәуіріндегі Қазақстан» атты Жолдауында айтылған тапсырмаларды жүзеге асыру мәселелері қаралды. Отырыста бірыңғай цифрлық экожүйе қалыптастыру, инновациялар мен IT-стартаптарды қолдау жөнінде нақты шешімдер қабылданды, деп хабарлайды Egemen.kz.

Фото: istockphoto.com

Атап айтқанда, Astana Hub халықаралық IT-стартаптар технопаркі өңірлік инновациялық және кәсіпкерлік орталық ретінде нығайтылатын болады. Қаржы, Ұлттық экономика, Жасанды интеллект және цифрлық даму министрліктеріне 2025 жылғы 10 қарашаға дейін аталған технопарк қызметінің басым бағыттарын кеңейту тапсырылды. Жаңа тізімге мультимедиа, ойын дизайны, бағдарламалық қамтамасыз етуді түрлендіру және киберспорт салалары енгізіледі. Сондай-ақ шетелдік компанияларға арналған бизнес-процестер аутсорсингі мен ағылшын тілін оқыту қызметтері де қосылады. Бұдан басқа, аталған тізбе ҚР резиденті еместерге бағдарламалық қамтуды пайдалана отырып, бизнес-процестер аутсорсингі, ағылшын тілін оқыту сияқты қызметтермен толықтырылды. Қызметтер аясын кеңейту Astana Hub-тың жаһандық технологиялық қоғамдастықты тарту орталығы ретіндегі ұстанымын күшейте түседі.

Сонымен қатар, барлық мемлекеттік мобильді сервистер SuperApp қағидаты бойынша eGov және Aitu платформаларына біріктіріледі. Бұл қадам әр ведомствоның жеке қосымшаларын қысқартып, азаматтар үшін ыңғайлы әрі қауіпсіз цифрлық кеңістік қалыптастыруға мүмкіндік береді.

Ал Alem.cloud ұлттық суперкомпьютерлік орталығында есептеу ресурстарын бөлу ережелері бекітіледі. Бұл ереже Astana Hub стартаптары, ғылыми ұйымдар, университеттер және жеке сектор үшін жоғары өнімді есептеу қуаттарын әділ бөлуге жағдай жасайды.

Alem.cloud инфрақұрылымы жасанды интеллект технологияларын дамытуға бағытталады және білім беру, медицина, ауыл шаруашылығы, энергетика, геологиялық барлау, көлік, логистика және өнеркәсіп сияқты маңызды салаларда қолданылады.