Дәулет Мұқаев Ұлттық қор балаларға бағдарламасы бойынша қуанышты жаңалықты жариялады

Мәжіліс депутаты Дәулет Мұқаев әлеуметтік желідегі парақшасында көпшілікті қуантатын ақпаратпен бөлісті. Бұл туралы Alash.kz ұлттық порталы хабарлады.

Халық қалаулысының айтуынша, «Ұлттық қор – балаларға» бағдарламасы аясында 2025 жылдың инвестициялық табысы бойынша еліміздегі әрбір балаға 130,71 АҚШ доллары көлемінде қаражат аударылған.

«Сүйінші! “Ұлттық қор – балаларға” бағдарламасы бойынша әр балаға 130,71 доллардан түсті. 2025 жылғы инвестициялық табыстың қорытындысына сәйкес, бұл қаражат еліміздегі 6,9 миллионнан астам баланың шотына аударылды. Бағдарлама шарттарына сай, қаржы 18 жасқа дейінгі балаларға есептеледі», – деп жазды депутат.

Сондай-ақ Дәулет Мұқаев аталған қаражатты kids.enpf.kz сайтынан көруге болатынын атап өтті. Оның айтуынша, басқа қосымшаларда ақпарат әзірге көрінбеуі мүмкін.

«Ақшаны kids.enpf.kz сайтынан тексере аласыздар. Құтты болсын!» – деп түйіндеді ол.