Денсаулық сақтау саласындағы аудиттен кейін шенеуніктер жауапқа тартылды

АСТАНА, 6 қараша – Sputnik. Мемлекеттік аудиттен кейін Денсаулық сақтау министрлігінің және оған қарасты ұйымдардың лауазымды тұлғалары жауапкершілікке тартылды, деп хабарлайды Sputnik Қазақстан Жоғары аудиторлық палатаға сілтеме жасап.

Биыл Жоғары аудиторлық палата Денсаулық сақтау министрлігі мен оған қарасты ұйымдардың азаматтарды және ауруханаларды дәрі-дәрмек пен медициналық бұйымдармен қамтамасыз ету жұмысын тексерді.

"Анықталған заң бұзушылықтар мен кемшіліктер негізінде Жоғары аудиторлық палата тиісті лауазымды тұлғаларды жауапкершілікке тартуды тапсырды", - деп жазылған хабарламада.

Нәтижесінде мына тұлғаларға түрлі тәртіптік жазалар қолданылды:

ҚР ДСМ Дәрі-дәрмек саясаты департаментінің директоры;

ҚР ДСМ Фармацевтикалық және медициналық өнеркәсіпті дамыту департаментінің директоры;

ҚР ДСМ Ғылым және адами ресурстар департаменті директорының орынбасары;

"Инфекцияға қарсы препараттардың ғылыми орталығының" директоры;

"Дәрілік заттар мен медициналық бұйымдарды сараптау ұлттық орталығы" бас директорының орынбасары;

"Салидат Қайырбекова атындағы Ұлттық ғылыми денсаулық сақтауды дамыту орталығы" АҚ басқарма төрағасының орынбасары.

Сондай-ақ биыл 3 шілдедегі бұйрықпен "СК-Фармация" ЖШС басқарма төрағасының өкілеттігі мерзімінен бұрын тоқтатылды.