Дербес кредиттік рейтингті қалай жақсартамыз

Қаржы нарығын реттеу және дамыту агенттігінің сөзінше, әр адамның өз атына жазылған кредиттік тарихы бар. Ол адамның бұрын алған несиелері, төлемдері және банктермен жұмыс істеу тәртібі туралы мәліметтерді қамтиды. Осы ақпарат негізінде арнайы ұйымдар дербес кредиттік рейтингті есептейді, деп жазады Egemen.kz.

Дербес кредиттік рейтинг дегеніміз адамның несие төлеу тәртібіне байланысты қойылатын баға. Ол автоматты түрде есептеледі. Рейтингке төлемнің уақытылы жасалуы, кешіктірілген күндердің болуы, қанша кредит бар екені және қарыздың коллекторларға берілген-берілмегені сияқты факторлар әсер етеді. Бұл рейтинг ақпарат ретінде ғана беріледі. Яғни жоғары балл алған адамға банк міндетті түрде несие береді деген кепіл жоқ. Себебі әр қаржы ұйымының өз бағалау жүйесі бар.

«Кредиттік рейтинг неғұрлым жоғары болса, адамның сенімділігі соғұрлым артады. Банк ондай клиентке несие беруге оң көзбен қарайды. Ал рейтинг төмен болса, банк немесе микроқаржы ұйымы несие беруден бас тартуы мүмкін. Рейтинг төмен болған жағдайда бұл қарызды қайтармау қаупінің жоғары екенін көрсетеді. Банк мұндай жағдайда несие бермеуге құқылы. Тіпті кешіктірілген төлем болмаса да, банк тәуекелді жоғары деп санаса, бас тартуы мүмкін», дейді агенттік.

Рейтингті жақсарту үшін несиені уақытында төлеу керек. Төлемді есептен шығару күніне дейін бірнеше күн бұрын жасаған дұрыс. Егер несие мерзімінен бұрын өтелсе, банкке барып толық өтелгені туралы анықтама алған жөн. Егер төлем кешіксе, кредитордан қашпай, мәселені бірге шешу керек. Қазақстанда мұндай жағдайларды реттеудің арнайы тәртібі бар.

Әр адам өз рейтингін жылына бір рет тегін біле алады. Ол үшін eGov.kz порталына немесе Бірінші кредиттік бюроның сайтына кіруге болады.  Өзіңізбен бірге жеке куәлік болса жеткілікті. Егер бұл бірінші рет болса, есеп тегін беріледі.