Дипфейк арқылы алдауға шариғатта тыйым салынады ҚМБД пәтуа шығарды

АЛМАТЫ, 12 қаңтар – Sputnik. Дипфейк технологиясы арқылы жалған ақпарат таратуға шариғатта тыйым салынады. Қазақстан мұсылмандары діни басқармасы пәтуа шығарды.

Ислам діні ғылым мен технологияның дамуына, жаңалық ашуға тыйым салмайды. Алайда бұл даму адамзат игілігіне, әділеттілікке, адамгершілікке негізделіп, шариғаттың аясында жүзеге асуға тиіс. Сондықтан кез келген технология игі мақсатта қолданылса – рұқсат, ал жамандыққа, зиянды мақсатта қолданылса тыйым салынады, дейді мүфтият.

"Deepfake технологиясы арқылы адамның шын мәнінде айтпаған сөздерін айтқандай немесе істемеген іс-әрекеттерін істегендей етіп жасау, жалған ақпарат таратуға шариғат бойынша қатаң тыйым салынады. Мұндай жалған ақпарат тарату ел тыныштығын бұзып, қоғам ішінде іріткі тудырады", - дейді басқарма.

Мүфтият мұндай жағдайдың алдын алмаса, салдары елдің ынтымақ-бірлігіне сызат түсіріп, қоғамға залалын тигізтінін атап өтті. Мұндай контент адамдарды қорқытып, өміріне қауіп төндіруі мүмкін. Тіпті қалжың түріндегі қорқытуға да шариғатта қатаң тыйым салынған.

Дипфейк – жасанды интеллектті қолдану арқылы жалған бейнежазбалар жасау технологиясы.