Дүниежүзілік денсаулық сақтау ұйымы балалар үшін қауіпті дәрілер туралы ескерту жасады

Дүниежүзілік денсаулық сақтау ұйымы (ДДСҰ) Үндістанда балалардың өліміне себеп болған қауіпті сұйық дәрілік препараттарға байланысты ресми ескерту жариялады,  - деп хабарлайды Aikyn.kz Еуразия Бірінші арнасының ақпаратына сілтеме жасап.

Ұйымның мәліметінше, Үндістанда өндірілген кейбір сұйық дәрілерден техникалық спирт — диэтиленгликоль анықталған. Бұл заттың адам ағзасына түсуі ауыр улануға және өлімге әкелуі мүмкін. Осы уланудан кемінде 17 баланың көз жұмғаны хабарланды.

Тексеру барысында қауіпті деп танылған дәрілердің кейбір партиялары Sresan Pharmaceutical, Rednex Pharmaceuticals және Shape Pharma компанияларына тиесілі екені анықталған. Олардың өнімдері — «Coldrif», «Respifresh TR» және «ReLife» препараттары.

Үндістан билігі бұл дәрілердің өндірісін дереу тоқтатуға бұйрық берді. Ал ДДСҰ басқа мемлекеттерге осындай сапасыз және қауіпті өнімдердің нарыққа өтіп кетпеуін қатаң бақылауға алуды ұсынды.

Сараптама, зерттеу мақала, күнделікті өзекті ақпаратты «Айқынның»  TELEGRAM  арнасынан табасыз.