Душанбеде Қазақстан киносы күндері басталды

Іс-шараның ашылу салтанатында Қазақстанның Тәжікстандағы елшісі Уәлихан Төреханов сөз сөйлеп, екі елді тек стратегиялық әріптестік қана емес, сонымен бірге рухани құндылықтар мен ғасырлар бойы қалыптасқан достық, өзара түсіністік және құрмет байланыстыратынын атап өтті.

Оның айтуынша, мәдениет, әсіресе кино өнері, халықтар арасындағы диалогты тереңдетуде маңызды рөл атқарады.

– Бүгін біз Тәжікстан көрермендеріне заманауи қазақстандық фильмдерді ұсынып отырмыз. Бұл туындылар дарынды режиссерлер мен актерлердің еңбегімен жасалып, халқымыздың бай мәдениетін, тарихын, рухын және бүгінгі өмірін көркем бейнелейді, – деді қазақстандық дипломат.

«Тәжікфильм» киностудиясының директоры Махмадсаид Шохиёнов өз сөзінде қазақстандық кинематограф әрдайым жоғары кәсібилігімен, терең мазмұнымен және шынайылығымен ерекшеленетінін жеткізді.

– Қазақстан режиссерлерінің фильмдері халықаралық фестивальдерде жүлдеге ие болып қана қоймай, Тәжікстан халқының жүрегінен де орын табуда, – деп атап өтті ол.

Кино күндерінің ашылу фильмі ретінде режиссер Серікбол Өтепбергеновтің «Патриоттар уақыты» картинасы көрсетілді.

– Біздің фильмді тәжік көрерменіне ұсынғанымызға қуаныштымыз. Туындыда ерлік пен батылдық, Отанға адалдық, отбасы құндылықтары мен махаббат жайлы баяндалады, – деді Kazinform тілшісіне берген сұхбатында басты әйел рөлін сомдаған Зарина Хаджиметова.

Көрермендер сондай-ақ қазақ балуаны Қажымұқан Мұңайтпасов туралы түсірілген «Балуан. Қажымұқан – әлем чемпионы» биографиялық фильмі мен қазақ ән өнерінің саңлағы Әміре Қашаубаевтың өмірі мен шығармашылығына арналған «Әміре» картинасын тамашалай алады.

Айта кетейік, Тәжікстанда қазақтың ұлы ақындары, ойшылдары мен ғалымдарының кітаптары таныстырылды.