“Эфир аяқталды, сізге полиция келді“ Қазақстанда TikTok трештен “тазарту“ жалғасуда

Қазақстан полициясы әлеуметтік желілердегі жағдайды жіті бақылауда ұстап отыр. Таяуда тәртіп сақшыларының назарына желінің екі қолданушысы - Түркістан облысындағы стример мен Ақтөбе облысының тұрғыны ілікті. Екеуіне қатысты себеп бір: жарияланған видеоларда балағат сөздер айтқан, деп хабарлайды Tengri Life.

Полиция мәліметінше, Түркістан облысы тұрғынының TikTok-тағы тікелей эфирі тексеруге негіз болған. Тәртіп сақшылары трансляция кезінде әйелдің балағат сөздер айтып, өзін агрессивті ұстағанын анықтады.

"Түркістан облысында интернет кеңістігіне жүргізілген мониторинг барысында полиция қызметкерлері Tik Tok әлеуметтік желісіндегі тікелей эфир кезінде әйелдің агрессивті мінез-құлық танытып, былапыт сөздер қолданған бейнежазбасын анықтады", - деп хабарлады полиция.

Құқық қорғау органдары әйелдің жеке басын анықтады. Ол 39 жастағы Қазақстан азаматы болып шықты. Материалдар сотқа жолданып, ол жауапқа тартылды. Әйелге нақты қандай жаза қолданылғаны айтылмады.

Осыған ұқсас жағдай Ақтөбе облысында болды.

Мониторинг кезінде қызметкерлер TikTok және Instagram желілерінде жарияланған видеоларды анықтады. Полиция мәліметінше, ролик авторы бейәдеп сөздер қолданған.

"Интернет кеңістігіне жүргізілген мониторинг барысында полиция қызметкерлері TikTok және Instagram әлеуметтік желілерінде бейәдеп сөздер айтылған бейнежазбаны анықтады", - делінген хабарламада.

Жарияланым авторы Ақтөбе облысының 38 жастағы тұрғыны екені белгілі болды. Полиция ер адамның жауапқа тартылғанын хабарлады.

Полиция әлеуметтік желілерге мониторинг жүргізу жалғасып жатқанын, ал интернеттегі жарияланым мен тікелей эфир кез келген басқа қоғамдық іс-әрекеттер сияқты қаралатынын атап өтті.

"Әлеуметтік желілер - көпшілікке қолжетімді қоғамдық кеңістік. Қазақстан Республикасының қолданыстағы заңнама талаптары интернет пайдаланушылардың әрекеттеріне толық қолданылады", - деді ведомство өкілдері.

Еске сала кетейік, өзгелердің жан ауруынан "хайп" жасау, адам ұрлау және электршокермен пранк ұйымдастыру бірнеше қазақстандық стример үшін айыппұл және қамауға алумен аяқталған болатын. ІІМ мұндай контентті анықтау және әлеуметтік желі қолданушыларының шағымдарын қарау бойынша жұмысты жалғастыратынын атап өтті.

Мәселен, жақында Абай облысында 26 жастағы қыз TikTok-тағы тікелей эфирден кейін қамауға алынды. Ол трансляция кезінде былапыт сөйлеп, әдепсіз мінез-құлық көрсеткен және есірткі қолданатынын айтқан.

Тағы оқыңыз: Атақты адамдардың видеоларына сенбеңіз: қазақстандықтарға жаңа схема туралы ескертілді

Google News арқылы жаңалықтарымызды қадағалаңыз