Екі айлық үзілістен кейін Теңіз мұнайы қайтадан БТД құбыры арқылы жеткізіледі

Tengizchevroil биылғы тамыздан бері жүзеге аспай келген Баку–Тбилиси–Джейхан (БТД) мұнай құбыры арқылы шикізат жөнелтуді қайта бастады, деп жазады oilcapital.ru.

Қараша айында компания Теңіз кен орнынан осы бағытқа 130 мың тонна мұнай экспорттауды жоспарлап отыр.

Шілде айында БТД құбырындағы AzeriBTC маркалы мұнайдан хлоридтермен ластану анықталған болатын. Осыған байланысты Түркия портындағы тиеп-жөнелту амалдары тоқтатылып, Әзірбайжан мен Қазақстан тарапынан жеткізілімдер уақытша үзілген еді.

Соған қарамастан, қыркүйек айында «ҚазМұнайГаз» Қашаған кен орнынан БТД бағытына мұнай жөнелтуді қайта бастады. Ал Теңіз кен орнынан жаз ортасынан бері бұл құбыр арқылы жеткізілім жүргізілмеген.

Осы жылдың алғашқы 9 айында Қазақстан БТД арқылы 0,9 млн тонна мұнай экспорттады. Алдағы жылы бұл көлемді 2,2 млн тоннаға жеткізу жоспарлануда, 2025 жылы құбыр арқылы 1,7 млн тонна мұнай тасымалдау көзделген.

Бүгін, 11:33