Екібастұзда құны 235 млн теңгеден асатын көлік мемлекетке қайтарылды

Қалалық прокуратура мемлекет тарапынан мүлікке құқықтарды сатып алу кезінде заңдылықтың сақталуына талдау жүргізді.

2024 жылы «Екібастұзтеплоэнерго» ЖШС-нен қалалық әкімдіктің коммуналдық меншігіне жалпы баланстық құны 5,34 млрд теңге болатын мемлекеттік мүлік қабылданған.

Алайда жергілікті атқарушы орган тарапынан 21 автокөлік құралына меншік құқығы тіркелмеген, бұл кейіннен азаматтық-құқықтық қатынастарға байланысты 82 атқарушылық іс жүргізу шеңберінде тыйым салуға негіз болған. 

— Қадағалау актісі бойынша әкімдік талап-арыз жұмыстары жүргізіліп, сот шешімімен ауыртпалықтар алынып тасталды, нәтижесінде құны 235 млн теңгеден асатын мүлік мемлекеттік меншікке қайтарылды. Аталған арнайы техника қаланың коммуналдық қажеттіліктері үшін пайдаланылатын болады, — делінген хабарламада.

Осыдан бұрын Екібастұзда мемлекеттік қызметшілер құмар ойындарын ойнағанын жазғанбыз.