Елде кедендік және логистикалық қызмет көрсететін цифрлық жүйе енгізіледі

Жаһандағы әуе жүк тасымалы жыл сайын шамамен 4 пайызға артып отырады. Бұл алдағы 20 жылға айқындалған меже.

Осы тұста Қазақстан Еуропа мен Азияны байланыстыратын маңызды хабқа айналмақ. Қазір елде кедендік рәсімдерді цифрландыру, әкімшілік жұмыстарын жүйелеу, ең бастысы, бірқатар өңірде жаңа жолақтар салып, әуе флотын жаңартуға бейілміз. Бұл атқарылып жатқан жұмыстар. Бұдан бөлек Embraer сияқты алып компаниямен тығыз байланыс орнайды. Сөйтіп алда ауыр ұшақтарға техникалық қызмет көрсететін аумақтық сервис орталығы салынады.

Келесі жылы елде кедендік және логистикалық қызмет көрсететін бірыңғай цифрлық жүйе, Smart Cargo, енгізіледі. ҚТЖ базасында Ұлттық әуе жүк тасымалдаушы компаниясы іске қосылады. Бұл мемлекет басшысының бастамасымен қолға алынған жобалар. Әсіресе, өңделген өнімдерді әуе көлігімен тасымалдауға басымдық беріледі. Әлбетте Еуропа мен Азияны жалғау міндетін ұмытпаймыз. Бұл біздің ғана емес, жаһандық нарықтың басты бағыты.

Асқар Ақылбеков, ҚР Көлік министрлігі Азаматтық авиация комитетінің бас сарапшысы:

- Қазақстан өзінің географиялық орналасу жағынан Еуропа мен Азияны жалғайтын маңызды транзиттік дәліз саналады. Бұл елге халықаралық жүк ағындарын тартуға және өңірлік логистикалық хабқа айналуға үлкен мүмкіндік береді. Өткен жылы Қазақстанның авиациялық саласында айтарлықтай өзгерістер болды. Біріншіден, Алматы, Шымкент және Қызылорда қалаларындағы жаңа жолаушы терминалдарының құрылысы аяқталуы. Бұл заманауи кешендерінің өткізу қабілетін арттырып қана қоймай, жолаушыларға көрсетілетін қызмет сапасын жаңа деңгейге көтерді.

Оның үстіне уақыт өткен сайын жүкті жеткізу мерзімін барынша қысқартуға көңіл бөлінеді. Бұл үшін арнайы дрондарды пайдаланып жатқан елдер көп. Біз де осындай технологияларды меңгеруге тиіспіз. Былтыр жүк тасымалын дамытудың жол картасы бекітілді. Оның аясында Қарағанды әуежайы жүк хабы ретінде жабдықталады. Экономист Қажыкелді Шамбыл да елдегі авиацияны дамыту үшін орталық бағытты пайдалану қажет дейді.

Қажыкелді Шамбыл, экономист:

- Қытайдың, Еуропаның ұшақтары көп жағдайда Қырғызстан, Өзбекстан арқылы өтеді. Бірақ географиялық тұрғыда Қырғызстан мен Өзбекстан төтесінен тұрса да, глобуспен пайдалансаңыз, ол жақ арқылы ұшу қымбатырақ шығады. Қазақстан арқылы ұшу керек. Ең бір тиімді жол - Жезқазған бағыты. Ақтөбе облысының ортасы, әрі қарай Атырау мен Ақтау, Каспий арқылы Еуропаға шығып кету.

Қазақстан – Еуропа ғана емес, жаһандық транзиттік желіні байланыстырушы аймақ болу керек. Мақсатқа жету үшін ауыр ұшақтарды қабылдауға қауқарлы ұшу-қону жолақтарын кеңейтіп, қойма және логистикалық инфрақұрылымды жетілдіру маңызды.

Асқар Ақылбеков, ҚР Көлік министрлігі Азаматтық авиация комитетінің бас сарапшысы:

- Кедендік рәсімдерді цифрландыру және әуе жүк тасымалы бойынша автоматтандырылған платформа іске қосу жұмыстары жүргізілуде. Бұл жүк айналымын жетілдіріп, бизнес үшін шығындарды азайтуға,  процестерді азайтуға бірден бір құрал.

Жалпы Қазақстан автомобиль, теміржол және су жолын барынша дамытып келеді. Бұл орайда қазба байлықтар, ауыл шаруашылық өнімдері мен өзге де тауарлар тасымалы еселеп артып отыр.  Енді әуе жолын реттеу жүкті тез әрі сапалы жеткізуге мүмкіндік бермек. Мұның сыртында жолаушы тасымалы да бар. Жыл басынан бері отандық әуежайларда 24 млн жолаушыға қызмет көрсетілді.

Авторы: Мерей Мұратханқызы