Тоқаев мәслихаттардың мерзімінен бұрын сайлауын жариялады

Мемлекет басшысы Қасым-Жомарт Тоқаев елде бүкіл мемлекеттік басқару жүйесі заман талабына сай жаңғыртылып жатқанын айтты, - деп хабарлайды Tengrinews.kz Ақорданың баспасөз қызметіне сілтеме жасап.

Президент бұл жұмысты жалғастыру қажет екенін қадап айтты.

"Қазіргі кезеңде біз жергілікті өкілді органдардың, яғни мәслихаттардың сайлауын өткізуіміз қажет. Мәслихат депутаттарының өкілеттігі Конституцияда және тиісті заңдарда айқындалған мерзімге дейін сақталады. Дегенмен олардың көпшілігі "Amanat" партиясының атынан сайланды. Бүгінде бұл саяси ұйым "Әділет" партиясына қосылып, өз қызметін тоқтатты", - деді Президент.

Президент жақында тиісті заңнамалық рәсімдер аяқталатынын айтты.

"Сол кезде мәслихат депутаттарының басым бөлігінің қызметінің заңдылығына қатысты мәселе туындайды. Жалпы, жергілікті депутаттар аймақтағы жұртшылықтың мүддесін қорғайды, бюджетті бекітеді және басқа да міндеттерді орындайды. Бір сөзбен айтқанда, елді-мекендерді өркендету ісіне белсене атсалысады. Демек, өкілді органдар қызметінің заңға сәйкес болуы айрықша маңызды. Сондықтан мен жақын арада премьер-министрмен және Құрылтай төрағасымен барлық деңгейдегі мәслихаттардың өкілеттігін мерзімінен бұрын тоқтату жөнінде кеңесемін. Содан соң тиісті Жарлыққа қол қоямын".

Президенттің сөзінше, көп ұзамай Орталық сайлау комиссиясы сайлау өтетін күнді жариялауы керек.

"Бұл қадам мәслихаттардың білікті әрі кәсіби корпусын қалыптастыруға жол ашып, оның жұмысына тың серпін береді. Осы сайлаудың жоғары деңгейде және сапалы өтуіне сіздер де мол үлес қосасыздар деп сенемін", - деді Президент.

Сонымен қатар, іс-шара барысында Қасым-Жомарт Тоқаев Қазақстанға халықаралық ынтымақтастықты тереңдету және елге келетін инвестиция көлемін арттыру.

Бізді Google-дың негізгі дереккөздер тізіміне қосыңыз