Сұмдық апаттан кейін қазақстандық өз өмірін өзгертуге шешім қабылдап, ерекше саяхатқа аттанды

Осыдан бірнеше жыл бұрын Еркебұлан Жұмаділлаев ауыр жол апатынан кейін өзі жүру мүмкіндігі үшін күрескен болатын. Бүгінде ол велосипедпен мыңдаған шақырымды бағындырып, Ыстанбұлға да жетіп үлгерді. Tengri Travel қазақстандықпен жай ғана сапар емес, ол үшін мәні әлдеқайда тереңірек болған саяхаты туралы сөйлесті.

Саяхаттың басталуы

27 жастағы Еркебұлан Жұмаділлаев Сарыағаш өңірінің тумасы. Мамандығы бойынша мануалды терапевт-массаж жасаушы, шипажайда жұмыс істейді.

Еркебұлан алыс сапарға шығу ниеті туралы бастығы Ерболға айтқан. Ер адамның сөзінше, ол Еркебұланның шешімін қолдап, саяхатқа дайындалуға көмектескен: велосипед алып беріп, жол шығындары, тамақ, баспана және жөндеу жұмыстарына қолдау көрсеткен.

Еркебұлан Сарыағаштан жолға 2024 жылдың 20 тамызында шықты. Қазір ол Ыстанбұлда, сапарын одан әрі жалғастырады.

Instagram-дағы бұл жарияланымды көру

Жұмаділлаев Еркебұлан Көпжанұлының (@erke_doctor) жарияланымы

Мұндай бағытты еңсеру үшін тек ниеттің болуы жеткісіз екені анық. Алда - мыңдаған шақырым, түрлі елдер, құбылмалы ауа райы, жолдар мен көптеген тұрмыстық мәселелер бар. Бірақ Еркебұлан дәл велосипедпен жүруді жөн көрді.

Instagram-дағы бұл жарияланымды көру

Жұмаділлаев Еркебұлан Көпжанұлының (@erke_doctor) жарияланымы

Жол бойында ол саяхаттың түрлі кезеңдерін көрсетіп, блогында кадрларды бөлісіп отырады. Оның алдында әлі мыңдаған шақырым жол, бірнеше елдің соқпақтары мен көптеген сынақтар тұр.

Instagram-дағы бұл жарияланымды көру

Жұмаділлаев Еркебұлан Көпжанұлының (@erke_doctor) жарияланымы

Еркебұлан қазір өзіне адамдардың қолдауы - тек материалдық емес, сонымен қатар жылы лебіздері өте маңызды екенін атап өтті.

Алайда бұл саяхатқа дейін оның өмірінде ұзақ әрі қиын оңалту жолы болды. Ол үшін жол велосипедтен емес, аурухана палатасынан басталды.

2023 жылдың қаңтарында Еркебұлан Жезқазғанда - Қызылорда-Павлодар тасжолында ауыр апатқа ұшырады. Жол-көлік оқиғасы салдарынан ол ауыр бас-сүйек жарақатын алып, екі айға жуық комада жатты.

"Мен комада жатқанда, анамның айтуынша, салмағым небәрі 38 келі болыпты", - дейді Еркебұлан.

Есін жиғаннан кейін оңалту кезеңі жалғасты. Ер адамның айтуынша, ол өз бетінше қозғала алмайтын, тамақ іше алмайтын және көрмейтін де еді. Тоғыз ай бойы оған трахеостомиялық түтікпен жүруге тура келді. Кейінірек ол емін Астанада жалғастырды.

Фотоны сұхбат беруші ұсынды

Бүгінде жақын адамдарының ішінде ең алдымен ата-анасы қасында. Еркебұлан ең қиын сәттерде олардың бәріне дайын болғанын айтады.

"Бұрын достарым көп болатын. Апаттан кейін оларды көрген де жоқпын десем болады. Ата-анам, отбасым мен балаларым бар. Бірақ қазір тағдырдың жазуымен жұбайыммен бөлек тұрамыз. Өмірдің барлық қиындығына қарамастан, мен алға жылжуға және сенімімді жоғалтпауға тырысамын", - деп бөлісті ер адам.

Бастан өткерген оқиғалары Еркебұланды өмірге басқаша қарауға мәжбүр етті. Осының бәрінен кейін ол сапарға шығуды ұйғарған.

"Мен үшін бұл жай ғана саяхат емес. Бұл - рухани жол, өз өмірімді қайта саралап, таза ниетпен алға басу мүмкіндігі", - деп түйіндеді Еркебұлан.

Тағы оқыңыз: “12 күнге бәрінен бас тарту“: қазақстандықтар Сантьяго жолына не үшін барады?

Бізді Google-дың негізгі дереккөздер тізіміне қосыңыз