Тайландтағы COVID 19 дың жаңа толқыны ма? Қазақстандықтар нені білуі керек

Таиландта COVID-19 жұқтыру деңгейі артып келеді. Осы елге сапарлауды жоспарлап отырған қазақстандықтар нені білуі керек және қазір туристерге шектеулер бар ма - Tengri Travel тарқатып айтады.

Таиландта COVID-19 бойынша жағдай қандай?

The Phuket News жаңалықтар порталының 2 қыркүйектегі ақпаратына сәйкес, 31 тамыздағы жағдай бойынша Пхукетте 100 мың адамға шаққанда COVID-19-дың 514,85 жағдайы тіркелген. Бұл провинцияны Таиландтағы сырқаттану деңгейі бойынша үшінші орынға шығарды.

Бірінші орында Бангкок - 100 мың тұрғынға 643,65 жағдай, екінші орында 530,52 көрсеткішпен Чонбури провинциясы тұр.

Ауруларды бақылау департаменті Пхукеттегі мұндай көрсеткішті аралдың өзіндік ерекшеліктерімен түсіндірді. Бұл - халық тығыз орналасқан ірі туристік бағыт.

"Сырқаттанушылықты тұрақты халық санына қатысты есептегенде, бұл инфекцияның белсенді таралуына ықпал етуі мүмкін", - деп жазады БАҚ.

Бұл ретте билік жағдайды төтенше немесе ерекше ауыр өршу деп санамайды. Олар сырқаттанушылықтың өсуін маусымдық сипатта деп бағалап, инфекция негізінен жеңіл белгілермен өтіп жатқанын атап өтті.

Қазір коронавирустың қай түрі таралып жатыр?

Таиландта Омикрон тобындағы коронавирус нұсқаларын бақылау жалғасып жатыр. Қазір елде анықталып жатқан негізгі қосалқы нұсқа - NB.1.8.1.

"Эпидемиологиялық қадағалау аясында анықталған жалпы жағдайдың 524-і немесе 50,14 пайызы осы нұсқаға тиесілі. Бұл нұсқа Таиландта 2025 жылдың ортасынан бері үздіксіз анықталып келеді", - делінген Таиланд Қоғамдық денсаулық сақтау министрлігінің Ауруларды бақылау департаментінің сайтында 1 қыркүйекте жарияланған хабарламада.

Сондай-ақ ведомство NB.1.8.1 нұсқасы аурудың ауыр өтуіне себеп болатыны туралы дәлелдер жоқ екенін мәлімдеді.

"Эпидемиологиялық қадағалау мәліметтеріне сәйкес, пациенттердің көпшілігінде симптомдар қарапайым суық тиюге ұқсас".

Қазақстандықтарға кеңес

Қазақстан Денсаулық сақтау министрлігінің Санитариялық-эпидемиологиялық бақылау комитеті елдегі COVID-19 бойынша эпидемиологиялық жағдай тұрақты екенін хабарлады. 2026 жылдың басынан бері COVID-19 жұқтырудың 103 жағдайы тіркелді, бұл 2025 жылдың сәйкес кезеңімен салыстырғанда аурушаңдық деңгейі 8,8 есе төмендегенін көрсетеді.

Комитет мәліметінше, шекарадағы барлық 26 өткізу пунктінде санитариялық-карантиндік бақылау тұрақты түрде жүргізіліп тұрады. Олардың барлығы жанасусыз дене қызуын өлшеу құралдарымен жабдықталған. Келген жолаушыларға қашықтықтан термометрия жасалады.

Егер жолаушыдан инфекциялық ауру белгілері анықталса немесе оған күдік туындаса, мамандар науқасқа және онымен байланыста болған адамдарға қатысты қажетті санитариялық-профилактикалық және эпидемияға қарсы іс-шараларды жүргізеді.

Шетелге, әсіресе экватор және тропик климаты бар елдерге шығу кезінде инфекциялық және паразиттік аурулардың алдын алу мақсатында қазақстандықтарға мынадай кеңес беріледі:

жеке гигиена ережелерін сақтау; қолды тұрақты жуу немесе антисептикалық құралдарды пайдалану; адамдар көп жиналатын жерлерде, әсіресе қоғамдық көлікте және жабық ғимараттарда медициналық маска тағу; денсаулықтың жеке тәуекелдерін, әсіресе созылмалы және ілеспе аурулардың бар-жоғын ескеру.

Саяхат кезінде немесе Қазақстанға оралғаннан кейін респираторлық инфекция белгілері пайда болса, дер кезінде медициналық көмекке жүгіну ұсынылады.

Сондай-ақ туристерге сапар алдында денсаулық жағдайын ескеру және медициналық сақтандыру шарттарын, соның ішінде шетелде COVID-19 емін өтейтінін алдын ала тексеріп алған жөн.

Таиландтағы қазақстандықтар не істеуі керек?

"Туристік Қамқор" корпоративтік қорының төрағасы Инна Рейдің айтуынша, қазір Таиландта 750 қазақстандық турист жүр.

Ол Таиландтағы COVID-19 жұқтыру деңгейінің артуы төтенше жағдай емес екенін атап өтті.

"Қазір Таиландтағы жағдай, шын мәнінде, әр елде дерлік болып тұрады. Біз коронавирус жұқтырғандар саны бірде өсіп, бірде төмендейтінін көріп отырмыз. Бұл көбінесе маусымдық өзгерістерге байланысты және көбіне суық тию ретінде бағаланады", - деп түсіндірді Инна Рей.

Оның айтуынша, егер жағдай пандемия деңгейіне жетсе, туристерді елге қайтару мәселесі нақты жағдайларға байланысты шешіледі.

Бұл ретте "Туристік Қамқор" қоры туристерді туроператордың кінәсінен Қазақстанға қайта алмай қалған жағдайда - мысалы, кері ұшу билеті, тұру немесе турда қарастырылған басқа да қызметтер төленбесе, елге қайтарумен айналысады.

Жақында кейбір ресейлік БАҚ Пхукетте COVID-19-дың жаңа толқыны басталғанын, ауырған туристер мен релоканттар ауыр симптомдарға тап болғанын хабарлаған еді. Кейін Таиланд Денсаулық сақтау министрлігінің Ауруларды бақылау департаменті бұл ақпаратты теріске шығарды. Ведомство аралда коронавирус әлі бар екенін, бірақ жағдай төтенше сипатта емес екенін мәлімдеді.

Осы хабарламалар аясында Tengri Health тілшісі қазір әлемде COVID-19 бойынша не болып жатқанын және Қазақстандағы жағдайдың қандай екенін анықтап көрді.

Сонымен қатар 28 тамыздан бастап Таиландта шетелдіктерді депортациялаудың жаңа ережелері күшіне енді. Онда адамды елден шығаруға қандай жағдайлар себеп болатыны және мұндай шешімнен кейін не болатыны егжей-тегжейлі сипатталған.

Бізді Google-дың негізгі дереккөздер тізіміне қосыңыз

Қосу