Электр велосипедтерін тіркеу және электрокарларға арналған арнайы нөмірлер Мәжіліс түзетулерді қабылдады

Қазақстанда жол қауіпсіздігіне, соның ішінде ұшқышсыз көлікке қатысты жаңа түзетулер қабылданды. Мәжіліс цифрландыру, дербес деректерді қорғау, жол жүрісі және көліктегі озық технологияларды реттеу мәселелері бойынша түзетулерді екінші оқылымда қабылдады, деп хабарлайды Tengri Auto.

Қазақстанда жол қауіпсіздігіне, соның ішінде ұшқышсыз көлікке қатысты жаңа түзетулер қабылданды. Мәжіліс цифрландыру, дербес деректерді қорғау, жол жүрісі және көліктегі озық технологияларды реттеу мәселелері бойынша түзетулерді екінші оқылымда қабылдады, деп хабарлайды Tengri Auto.

Түзетулер ең алдымен шағын мобильді көліктерге қатысты болды. Атап айтқанда, электрвелосипедтерді міндетті түрде тіркеу енгізіледі.

Қазіргі уақытта Қазақстанда қозғалтқыш қуаты 250 Вт-тан жоғары және ең жоғары жылдамдығы сағатына 25 шақырымнан асатын электрвелосипедтер мопедтерге теңестіріледі. Мұндай көлікті басқару үшін тіркеу және А1, А немесе В санатындағы жүргізуші куәлігі қажет. Аталған нормалардан төмен көліктерді тіркеу міндетті емес.

Жол жүрісі қағидаларын бұзғаны үшін мұндай электрвелосипед иелеріне 7 864-тен 196 600 теңгеге дейін айыппұл салынуы мүмкін екенін еске саламыз. Кейбір жағдайларда қамауға алу және жүргізуші куәлігінен айыру да қарастырылған.

Бұдан бөлек, билік жүргізушілерді даярлау жүйесіне бақылауды күшейтуді көздеп отыр. Заңнамада "оқу автодромы" ұғымы пайда болады, ал автомектептердің өзі бірыңғай тізілімге енгізіледі.

Сондай-ақ кейінгі жылдардағы ең көп талқыланған тыйымдардың бірі - автокөлік қозғалтқышын қыздыруға қойылған шектеуді қайта қарау туралы шешім қабылданды. Алайда ол толығымен жойылмайды: тұрғын үй аймақтарында тыйым сақталады.

Еске сала кетейік, Ішкі істер министрінің орынбасары Санжар Әділов ведомство мұндай өзгерістерге қарсы емес екенін айтқан болатын.

"Талқылау болғаны рас. Жұмыс топтары құрылды. ІІМ ұстанымын қысқаша айтсам: министрлік бұл ұсыныстарды қолдайды", - деді Санжар Әділов.

Бұған қоса электрмобильдер үшін мемлекеттік нөмірлердің жеке түрін енгізу жоспарланып отыр. Бұған дейін Tengri Auto редакциясы электрмобиль иелеріне қазіргі нөмірлерін ауыстыру қажет пе және жаңа формат қандай болатынын білу үшін ІІМ-ге сауал жолдаған болатын.

Министрлік түпкілікті үлгі әлі әзірленіп жатқанын, сондықтан егжей-тегжейлі ақпарат кейінірек - соңғы шешім қабылданғаннан кейін жарияланатынын хабарлады.

Айта кетейік, түзетулер ұшқышсыз аэротакси, жүргізушісіз автомобильдер және автоматтандырылған теміржол көлігіне де қатысты. Қазақстанда ұшқышсыз көлікті пайдалану үшін толыққанды құқықтық база құру жоспарланған.

Заңнамада жаңа ұғымдар пайда болады - соның ішінде "аэротакси", озық және қалалық әуе ұтқырлығы, вертипорт, қалалық әуе ұтқырлығы аймағы, ұшқышсыз әуе қозғалысына қызмет көрсету.

"Авиациялық техниканы пайдаланушылар, әзірлеушілер мен өндірушілер үшін жаңа сертификаттар беру көзделеді. Бұл eVTOL (тік ұшып-қонатын электрлі ұшақтар), аэротакси және басқа да жоғары автоматтандырылған әуе кемелерін қауіпсіз пайдалану үшін қажет", - деп хабарлады Мәжіліс.

Тағы оқыңыз: Қазақстандағы аэротакси: алғашқы рейстер қашан іске қосылатыны белгілі болды

Google News арқылы жаңалықтарымызды қадағалаңыз