Елімай Ордабасы ойынына төрелік еткен Арман Есмұратов қамауға алынды

Фото: kff.kz

Астана қаласының әкімшілік соты оны бес тәулікке қамау туралы шешім шығарды. Бұл туралы қоғам белсендісі Серік Байғалиев хабарлады.

Еске сала кетейік, 14 маусым күні Семей қаласында өткен матч кезінде төреші «Елімай» футбол клубының ойыншылары мен клуб басшылығына қатысты балағат сөздер қолданған.

Матчтан кейін ол әуежай арқылы Астанаға оралған сәтінде полиция тарапынан ұсталған болатын.

Бұған дейін де Арман Есмұратовтың аты дауға қалған болатын. 5 жыл бұрын «Атырау» – «Шахтер» матчынан кейін ол ойыншымен жанжалдасып, жанжал кезінде футболшыға қол көтергені туралы ақпарат тараған еді. Сол кезде ол маусым соңына дейін шеттетілген еді.

Еске сала кетейік, бұған дейін Милан Олимпиадасында мәнерлеп сырғанау бойынша төрешілік еткен Надежда Парецкаяға қатысты дау болған еді. Қазақстан атынан барған төрешіге кейбір ресейлік спортшыларға тым жоғары балл қойған деген айып тағылған еді.