Елімізде әскери дрон өндірісі қарқын алып келеді

Қазір елде ұшқышсыз басқарылатын аппараттарды әзірлеп, дайындайтын 10 шақты компания бар. Әскери бөлімдер олардың өнімін біртіндеп қолданысқа да енгізіп жатыр. Бұл бағыттағы жұмыстар елдің қорғаныс қабілетін күшейтіп, жауынгерлік әлеуетін арттыруға бағытталған.

Отандық дрондар көкті бағындыра бастады. Қанатсыз ұшатын, көзсіз көретін, үнсіз бақылап, шабуылдайтын әуе құрылғылары қазақ әскерінің әлеуетін арттырары сөзсіз. Мәселен, қазақстандық компаниялардың бірі “Шағала”, “Самұрық”, “Қарақұс”, “Жебе”, “Маса” атты әскери дрондарды құрастырып шыққан.   

Мерей Қанапия, тілші:

- Бұл ­- дрондарды құрастыратын бөлме. Мұнда барлауға, шабуылдауға арналған ұшқышсыз аппараттардың бірнеше түрі бар. 

Әліби Сейіт, аға инженер:

- Қазір біз жеңіл класты дрондарды жинап жатырмыз. бес дюйімдік, жеті және он дюйімдік дрондарымыз бар. Бұлар қазір көп пайдаланылатын FPV, камикадзе дрондар боп саналады. 

Өндірістік цехта шағын дрондардан бөлек ауыр класты құрылғылар да құрастырылады. Яғни барлығы жүк көтеруге ыңғайлы, салмағы ауыр, қуатты қозғалтқыштармен жабдықталған.  

Әліби Сейіт, аға инженер:

- Бұл - қазір жасалып жатқан жобаның бірі. Дайындары да бар. “Шағала” ұшқыш авиациялық кешені бар, жылу ағыны имитаторы бар нысаналы жаттығу кешені бар. 

Жанат Ахметов, нұсқаушы:

- Қазір заң өзгеріп жатыр. Дронды ұшыру үшін міндетті түрде сертификат алып, тіркеуге қою керек. Яғни 220 грамнан асатын болса сертификат керек. Қазір бірінші категорияны оқытып жатырмыз.  

Өнеркәсіп және құрылыс министрлігі әскери дрон өндірісін дамытып, елдің технологиялық әлеуетін арттыруға күш салып жатыр. Әсіресе отандық кәсіпорындарға басымдық беріп, жобаларына қолдау білдіруде. Сәйкесінше, қазір 10 шақты компания дрон өндірісін қолға алған.       

Елжас Бейбітұлы, ҚР ӨҚМ басқарма басшысы:

- Бүгінде әртүрлі мақсаттағы дрондарды құрастыру, баптау, бағдарламалау, тестілеу, мамандарды оқыту және оларға сервистік қызмет көрсету бойынша құзіреттер игерілді. Алдыңғы қатарлы шетелдік технологиялық компаниялармен серіктестікке корпустар, аспалы жабдықтар, электр компоненттері, баспалы платалар өндірісі локализацияланған. 

Елімізде дрондар ғана емес, жалпы әскери салаға қажетті қару-жарақ пен техниканың тең жартысы өзімізде өндіріледі. Яғни жауынгерлік техника дайындау, оны заманауи құрылығылармен жабдықтау бағытында ауқымды жобалар бар. 

Авторлары: Мерей Қанапия, Мұрат Әріпхан, Жандос Битабаров