Құс саңғырығынан энергия: Қазақстанда биогаз өндірісі қарқын алып келеді

Ауыл шаруашылығы министрлігінің мәліметінше, осы бағыттағы табысты жобалардың бірі – 2018 жылы құс қалдықтарын өңдеу арқылы биогаз өндіру жүйесін енгізген «Агрофирма Курма» ЖШС. Жоба аясында кәсіпорында электр және жылу энергиясы, сондай-ақ органикалық тыңайтқыштар өндірісі жолға қойылған. Инвестициялық жобаның жалпы құны 573 млн теңгені құрайды.

- Қазіргі уақытта биогаз станциясы тәулігіне 150 тоннаға дейін тауық саңғырығын өңдейді. Нәтижесінде құрамында 65% метан бар 22-23 мың текше метр биогаз өндіріледі. Электр энергиясын өндіру көлемі сағатына 600 кВт-қа дейін жетсе, органикалық тыңайтқыштар тәулігіне 20 тоннаға дейін шығарылады.

Жобаның негізінде құс шаруашылығынан шығатын органикалық қалдықтарды қайта өңдеу технологиясы жатыр. Ферментация барысында түзілген биогаз электр энергиясын өндіруге пайдаланылады. Сонымен қатар өндірілген органикалық тыңайтқыштар кәсіпорынның егістіктерінде қолданылып, импортқа тәуелділікті азайтуға және шығындарды қысқартуға мүмкіндік береді, - делінген ақпаратта.

Дерекке қарағанда, станция іске қосылғалы бері 15 млн киловатт-сағат электр энергиясы өндірілген. Кәсіпорын жыл сайын 100-190 млн теңге аралығында табыс табады.

Министрлік мәліметінше, «Агрофирма Курма» тәжірибесі өндірістік қалдықтарды тиімді басқару арқылы тұрақты әрі табысты бизнес-модель қалыптастыруға болатынын көрсетеді. Биогаз жобалары ауыл шаруашылығында қосымша табыс көздерін ашып қана қоймай, елдегі экологиялық бағыттағы өндірісті дамытуға да ықпал етеді.

Айта кетейік, аграрлық секторда су үнемдеу технологиялары күшейтілді.