Елімізде фонограммамен ән айтуға тыйым салынады

Фонограммамен ән салғандарға 3 млн 700 мың теңге айыппұл салынады. Бүгін Сенат тиісті құжатты жетілдіріп, Мәжіліске қайтарды. «Бұл норма отандық эстрададағы әділ бәсекені қалыптастырып, шынайы өнерді насихаттау мақсатында енгізіліп отыр» - дейді депутаттар.

Жұрт алдына ауызы бар емес, дауысы бар шыққан дұрыс. Ал бойынан ондай ұяңдық табылмаса талап та қатал, тыйым да бар. Енді көпшілік алдында ән шырқау үшін шамаңа қарауға тура келеді. Егер көрерменің 200 мыңнан асса фонограмма қорғай алмайды. Оны қолдансаң, айыппұл арқалайсың. 3 млн 700 мың теңгеңді шытырлатып санап алады. 

Айбек Сыдықов, ҚР Мәдениет және ақпарат министрінің орынбасары:

- Осы күнге дейін қолданыстағы заңнамаға сәйкес фонограммаға тыйым салынбады. Алайда фонограмманы пайдаланған жағдайда алдын ала хабарлау керек деген норма болған. Қазіргі таңда мәдени бұқаралық іс-шараларды өткізген жағдайда дауыстық-вокалдық фонограммаға тыйым салыну көзделіп отыр. 

Жанды әлде жасанды дауыста ән салғанды жергілікті билік анықтайды. Айыппұлға да солар жауапты. Бірақ концерт өткізуге бейімделмеген жерде фонограммаға тыйым жоқ. Бұлар көше, саябақ, ипподром және телевизиялық контент жасауға байланысты. 

Кітапхана залдары жалға беріледі

Сондай-ақ Сенат кітапханалардың кірісін арттыру жолын қарастырды. Елде 2 мың 800-ден аса кітапхана бар. Біразына демеу керек. Солардың мәслихат, акт және кинозалдарын жалға берсе жыртығы жамалып қалар еді. Оның үстіне цифрландыру дәуірінде кем дегенде тәуірлеу интернет те керек. 

Мәулен Әшімбаев, ҚР Парламенті Сенатының төрағасы:

- Осындай кезде біздің 40 пайыз кітапханаларымызда интернетпен жұмыс істеудің мүмкіндігі жоқ. Кітапханалар қызметтер көрсетіп қаражат тауып жатса, дұрыс шығар. Сонымен қатар мемлекеттің тарапынан, министрліктің тарапынан жалпы елдегі кітапханалар жүйесін, материалдық техникалық базасын күшейтуге бағытталған кешенді жұмыстар керек екені анық. 

Кітапхана залдары жалға мақсатты түрде беріледі. Яғни симпозиум, форум сияқты үндес шаралар өткізіледі. Тіпті ақын-жазушылар бұрынғыдай кітабының тұсаукесерін тегін емес, теңгеге өткізуі мүмкін. 

Айбек Сыдықов, ҚР Мәдениет және ақпарат министрінің орынбасары:

- Норма күшіне енгеннен кейін кітапхананың баға прейскурантын да міндетті түрде бекітіледі. Тапқан қаржыны дамуына жұмсай алады. Ол материалдық-техникалық базасын ұлғайтуға немесе қызметкерлеріне үстемақы төлеу, біліктілігін арттыру, семинар немесе шетелге іс сапарларға жіберу деген сияқты. 

Жалпы Сенат қараған заң мәдениет, білім беру, отбасы және мемлекеттік бақылау мәселесін қамтиды. Алайда құжаттың жекелеген баптарына басқаша байлам жасап Мәжіліске қайтарды.

Авторлары: Нысаналы Ығыл, Руслан Әлиев