Еліміздегі әрбір мал сканерден өтеді

Елде әрбір мал сканерден өтеді.

Ауыл шаруашылығы министрлігі биометрия әдісі арқылы төрт түлікті тіркеуге алады. Мәліметтер ортақ цифрлық базаға жүктеледі.

Бұл азық-түлік қауіпсіздігін қамтамасыз етуге және мемлекеттік қолдау шараларын тиімді жүргізу үшін қажет. Сөйтіп, биометрия қашан және қалай жасалады? 

Еркебұлан Смадияров, тілші:

- Ауыл шаруашылығы саласын цифрландыру кезең-кезеңімен жалғасады. Енді мәліметтер базасына шаруаның өзі ғана емес, мал басының да суреті енгізіле бастайды. Ол үшін әрбір төрт түлік сканерден өткізіледі. Тұқымы, жасы, алынған өнімі мен төліне дейін ақпараттық жүйеге жазылады. Мамандар осындай жаңа платформа дайындап, биометрия жасау тетіктерін пысықтап жатыр.

Жақсылық Еркінбекұлы, ҚР АШМ Басқарма басшысының міндетін атқарушы:

- Малды сканерлеу арқылы оның түр-түсі мен малдың күйін анықтайды. Оның салмағы қанша, ол қанша жем-шөп жеді, одан қанша өнім алуға болады, одан кейін оның породасы қандай, ол қашан төлдеді, ол племенной ма, барлығын сол биометрия арқылы көруімізге жол ашылады.

Жаңа жүйе алдағы үш жылда толық қолданысқа енуге тиіс. Дәл осы кезеңде егістік алқаптарының да тең жартысы цифрлық бақылауға алынады. Ғарыштық мониторинг құрғақшылық пен зиянкестерден келетін шығын көлемін азайтуға ықпал етеді, дейді мамандар. Ал мал басын таңбалауға жасанды интеллекті қолданыла бастайды.

Жаслан Мәдиев, ҚР Жасанды интеллект және цифрлық даму министрі:

- 2028 жылға қарай малдың 90 пайызы RFID-белгілер (эр-эф-ай-ди белгілер) мен жасанды интеллект арқылы таңбаланады. Ал ауылшаруашылық жерлерінің кемінде 50 пайызы цифрлық бақылауға алынады. Осы арқылы егістік өнімін 20-25 пайызға арттыруға болады.

Жасанды интеллект шаруалардың көмекшісіне айналады. Енді мемлекеттік қолдау шараларына қатысты фермерлердің сауалына нейрожелі автоматты түрде жауап береді. Қазір агроөнеркәсіп кешенінің экожүйесі әзірленіп жатыр. Онда түрлі платформалар біріктіріледі.

Жақсылық  Еркінбекұлы, ҚР АШМ Басқарма басшысының міндетін атқарушы:

- Бірегей окно арқылы барлығын, мысалы, субсидия беру, өзіңіздің шаруашылығынызға байланысты ақпаратты білгіңіз келсе, сол экожүйеге кіріп, өзіңізге керек мәліметті алуға мүмкіндік болады. Мысалы, шаруалардың әр түрлі туындайтын сұрақтары бар ғой, мәселелері болады.

Солар чат-ботта пысықталып, бірден жауап беріп жатады. 

Елде ұлттық ауыл шаруашылығы санағы аяқталды. Соның аясында 1,6 млн қосалқы шаруашылық пен 300 мың агроқұрылым қамтылған. Мамандар мал санынан бастап, жер телімі, арнайы техника мен тыңайтқышқа дейін мәліметтерін жинады. Қорытынды деректерді Ұлттық статистика бюросы келесі жылы жариялайды. 

Еркебұлан Смадияров