Елордалық мейрамханада қонақтарды шапан киген робот қарсы алды

Бұл бастама Есіл ауданы әкімдігі мен мейрамхананың бірлескен жобасы ретінде жүзеге асырылды.

Мейрамхана директоры Құралай Сауытбаева бұл идеяның қалай жүзеге асқанын айтып берді. Оның сөзінше, «Арыстан» атты робот-даяшы 2019 жылдан бері жұмыс істейді және осы уақыт ішінде келушілердің қызығушылығын тудыратын ерекше элементке айналған.

– Бізде «Арыстан» атты робот-даяшы бар. Ол мейрамхана ашылған сәттен, яғни 2019 жылдан бері жұмыс істейді. Осы уақыт аралығында ол жай ғана техника емес, балаларға да, ересектерге де қызық болатын ерекше нысанға айналды, – деді мейрамхана директоры.

Құралай Сауытбаеваның айтуынша, Наурыз мейрамы қарсаңында ұжым дәстүрлі безендірумен ғана шектелмей, қонақтарға ерекше атмосфера сыйлауды көздеген.

– Наурыз қарсаңында бізге бір ой келді: неге осы роботты ұлттық стильде қолданбасқа? Біз оны қазақтың ұлттық киімімен киіндіріп, қонақтарға ерекше көңіл күй сыйлағымыз келді. Идея қарапайым болғанымен, әсері айрықша болды. Осы арқылы дәстүрге деген құрметімізді білдіріп, мерекелік көңіл күй қалыптастырғымыз келді, – деді ол.

Айта кету керек, бойы 1 метр 32 сантиметр болатын «Арыстан» бір мезгілде бірнеше тапсырысты жеткізе алады. Ол даяшылармен бірге қозғалып, шаршамай жұмыс істейді және қателік жібермейді. Дегенмен, робот адам еңбегін алмастырмайды, керісінше қызмет көрсету үдерісін жеңілдетіп, даяшыларға қонақтармен көбірек қарым-қатынас жасауға мүмкіндік береді.

Осылайша, елордада өткен Ұлттық киім күні дәстүр мен заманауи технологиялардың үйлесімді ұштасуының ерекше үлгісіне айналды.

Бұдан бұрын ТЖМ инновациялық өрт сөндіруші роботты таныстырғанын жазған едік.