Енді әскери теңізшілер елде даярланады

Әскери теңізшілерді елдегі жоғары оқу орындары даярлап жатыр. Бұрын Оңтүстік Корея, Германия мен Ресейден оқып келетін. Енді Ақтөбе мен Ақтаудағы институтта арнайы бөлім ашылды. Қазіргі таңда төрт курсант мемлекеттік грантқа түсті. Олар екі жылдан кейін офицер шенін алып, әскери флотқа қабылданады.

Әскери теңізші формасын киген курсанттар – алғашқы түлектер. Олар алдымен Ақтөбедегі әуе қорғанысы институтында екі жыл оқыды. Соңғы екі курс Ақтаудағы әскери теңіз кафедрасында өтіп жатыр. 21 жастағы Диасхан Молдахан Тараз қаласының тумасы. «Сарыарқа» кемесінде мерзімді әскери қызмет атқарған бозбала офицер болуды армандайды.

Диасхан Молдахан, курсант:

- Мамандығымыз бойынша көптеген пән бар. Сол пәндерді жақынырақ танысуға бізге көмегін тигізіп жатыр. Атап өтсек, «Теңіз навигациясы», «Теңіз астраномиясы», «Жаһандық проблемалар теңізде болып жатқан», теңіз конвенциясы жағынан бізге білім беруде. Мемлекет оқуды тегін оқуға мүмкіндік берді.

Курсанттар барлық жағдай жасалған казармада тұрады. Сабақтан бос уақытта кітап оқып, гитарады ойнауды үйренеді. Казарма ауласында күнделікті спортпен айналысып, денесін шынықтырады. Әскери теңіз флотына баратын жастар жоғары оқу орнына «Sarbaz 2.0» бағдарламасы бойынша ҰБТ тапсырмай-ақ қабылданған.

Нұрбол Шалабаев, Ақтау гарнизоны баспасөз қызметінің бастығы:

- Оқу бітірген курсанттарға «Лейтенант» шені беріледі. Алдағы уақытта олар Қазақстанның әртекті әскери кемелер дивизионындағы су көліктеріне командир қызметіне қабылданады деп күтіледі.

Отан алдындағы борышын өтеген жастар Қазақстанның әскери оқу орындарына түсу үшін «e-Gov» порталы арқылы құжат тапсыра алады. Қорғаныс министрлігінің мәліметінше, 2023-2024 жылдар аралығында сарбаздарды тегін оқытуға 6 мың сертификат берілген. Биыл 10 мыңнан астам адам сынақтан өтіп, 2100-і мемлекеттік оқу грантына ие болды.

Авторлары: Талғат Исламұлы, Ренат Досалиев