Енді елімізде заңсыз неке қиятын имамдар 8 жылға дейін сотталады

Мәжіліс отырысында депутат Мұрат Әбенов заңсыз түрде қиылатын діни некелер мәселесін көтеріп, мұндай рәсімдер әйелдер мен қыздардың құқықтарының өрескел бұзылуына алып келіп жатқанын мәлімдеді, деп хабарлайды Arasha.kz.

Депутаттың айтуынша, ресми тіркелмеген, тек діни жолмен қиылған некелер кей жағдайда мәжбүрлі неке мен зорлық-зомбылық фактілерін жасыру құралына айналып отыр.

"Кәмелетке толмаған қыздарды алып қашқаннан кейін діни неке қиып, артынан жәбірленушіні тағдыр тәлкегіне тастап кететін жайттар бар. Мұндай деректер Қызылорда облысы мен Шымкент қаласында тіркелген. Бұған дейін заңсыз неке қиятын діни қызметкерлерді жауапкершілікке тарту туралы ұсыныс жасағанмын, алайда ол бастамама қарсы болғандар көп болды", – деді Мұрат Әбенов.

Оның пікірінше, жаңа Конституция қабылданғаннан кейін бұл бағыттағы заңнаманы қатаңдатуға толық мүмкіндік бар.

Депутаттың ұсыныстарының қатарында заңсыз діни неке қиятын имамдар мен өзге де тұлғаларға 5 жылдан 8 жылға дейін бас бостандығынан айыру жазасын енгізу және зорлау қылмысын аса ауыр санатқа ауыстырып, ең жоғары жаза мерзімін 15 жылға дейін арттыру мәселелері бар.

Айта кетейік, бұған дейін Түркістан облысында сүйгені бар қызды алып қашып, күш көрсеткен адамдардың жауапқа тартылмағаны жөнінде ақпарат жарияланған болатын.