Енді мектепте гинеколог болады: Еліміздің бас педагогы шұғыл хабарды айтты (ВИДЕО)

Оқу-ағарту министрі Жұлдыз Сүлейменова соңғы уақытта елде жиілеп кеткен жасөспірімдер арасындағы жүктілік мәселесіне қатысты пікір білдірді, деп Arasha.kz тілшісі Ulysmedia.kz-ке сілтеме жасап хабарлайды.

Министрдің айтуынша, мұндай қайғылы оқиғалар білім беру жүйесіндегі бақылаудың әлсіздігін және бірқатар жүйелі кемшіліктердің бар екенін айқын көрсеткен.

«Қазір Денсаулық сақтау министрлігімен бірлесіп, мектептерге гинеколог мамандарды қайта енгізу жолдарын қарастырып жатырмыз. Бұл — осындай жағдайлардың алдын алуға бағытталған маңызды қадам», — деді Жұлдыз Сүлейменова.

Ведомство басшысы мұндай жағдайларға қоғамның бейжай қарамауы тиіс екенін ерекше атап өтті.

«Жасөспірімдер мұндай ауыр жағдайды бастан өткергенде, терең психологиялық күйзеліс көреді. Сондықтан ең алдымен оларға моральдық және психологиялық қолдау көрсетіп, білімін жалғастыруына мүмкіндік жасау қажет», — деді министр.

Жұлдыз Сүлейменованың бұл мәлімдемесі соңғы аптада тіркелген екі шулы оқиғадан кейін жасалды: Ақтөбе облысында 9-сынып оқушысы сабақ үстінде босанса, Түркістан облысында 15 жастағы қыз 71 жастағы ер адамнан бала туған. Екі дерек бойынша тергеу амалдары жүріп жатыр.