Енді жұмыс берушілер дипломның түпнұсқалығын тексере алады

АЛМАТЫ, 5 желтоқсан – Sputnik. Ғылым және жоғары білім министрлігі 1991 жылдан бері берілген дипломдардың түпнұсқалығын тексеру үшін деректер базасын құрды, деп хабарлайды ведомство.

Министрлік білім беру туралы құжаттардың мазмұнына қойылатын негізгі талаптарды, сондай-ақ жоғары оқу орындары түлектеріне арналған осындай құжаттардың серияларын бекітті.

"Дипломдар арнайы модуль арқылы бірегей нөмірлер мен QR-кодтар беру жолымен қалыптастырылады. Жүйеге қол жеткізу құқығы осы модульде тіркелген, ресми түрде жауапты университет қызметкерлеріне ғана беріледі", - деп жазылған хабарламада.

Өзіндік үлгідегі білім туралы құжаттарда генерацияланған бірегей нөмір мен QR-код болмаған жағдайда мұндай құжаттар жарамсыз деп танылады.

Бүгінгі таңда 46 жалған диплом және оларды заңсыз дайындаумен айналысқан 20 интернет-ресурс анықталды.

Жоғары оқу орындары деректерді цифрландыру жұмысын жалғастырады, ал жұмыс берушілер дипломның түпнұсқалығын https://epvo.kz сервисі арқылы тексере алады. Дипломның электронды нұсқасы электронды үкіметтің "Цифрлық құжаттар" мобильді қосымшасында да қолжетімді.